Үндэсний эвсэлийн тэргүүн УИХ-ын гишүүн Н.Номтойбаяр мэдээлэ хийлээ.
Н.Номтойбаяр: Надтай ажил хэргийн холбоотой ойрын хүмүүсийг хууль хяналтын байгууллагууд дуудаж учир битүүлэг байцаалт авах болсон. Хэдхэн жилийн өмнө МАН,АН дотроо хагарч төрд хямрал үүсэх завсар тухайн үеийн Ерөнхийлөгч Х.Баттулга Ерөнхийлөгчийн засаглал руу шилжих ноцтой үг үйлдэл гаргаж улмаар зам бүрд нь садаа болсон нэр бүхий улс төрчдийг хилс хэрэгт гүтгэн шоронд хэлмэгдүүлж байсныг санадаг. Энэ хүнийг төрийн хутгуур ч гэж хардаг. Тэр үед одоогийн Ерөнхийлөгч У.Хүрэлсүх Ерөнхий сайдаар ажиллаж байхдаа Х.Баттулгын дээрх үйлдлийг таслан зогсоосонд маш их талархалтай ханддаг.Итгэл хүлээлгэх албан бичигт дурдсан “Үүссэн улс төрийн нөхцөл байдлаас шалтгаалан цаашдаа сонгодог парламентын тогтолцоог төгөлдөршүүлэх шаардлагатай байна“ гэсэн нь онцгой анхаарал татаж байгаа учраас Төрийн байгуулалтын байнгын хороогоор итгэл хүлээлгэх хэлэлцүүлгийн үеэр ерөнхий сайд Л.Оюун-Эрдэнээс энэ тухай асууж тодруулж байж дэмжих эсхүл дэмжихгүй шийдвэрээ гаргана. Эцэст нь хэлэхэд УИХ-ын гишүүд маш их айдаст автсан байна, эргэлзээнд их орсон байна. Тэгэхээр УИХ-ын гишүүддээ итгэл үнэмшлээрээ зоригтой хэний ч нөлөөнд үл автаж энэ шийдвэрийг гаргаасай гэж уриалж байна гэв.
