Ерөнхий сайд хүү, бэрийнхээ тансаг хэрэглээнээс үүдэн огцорч, хамтарсан засгийн газар унах дээрээ тулаад байна. Гагцхүү огцрох шалтгаан улстөрийн болоод улны ялаа болтлоо тэвчсэн ард түмний тэсрэлт аль аль нөлөөлсөн биз...Юутай ч 2-р ээлжнийхэн хоолондоо хэмээн баярлаж, хуучин хэд нь нүхээ малтаж төрийн ордноор хөл хөдөлгөөн ихтэй байгаа бололтой.
Ерөнхий сайд Л.Оюун-Эрдэнэ гурван намаас бүрдсэн 16 яам, 22 сайдтай засгийн газрын толгой хүн. Түүний засгийн газарт ашиг сонирхлын зөрчилтэй сайд нар нилээн хэд бий.
"Ашиг сонирхлын зөрчил гэж нийтийн албан тушаалтан албаны бүрэн эрхээ хэрэгжүүлэх үед түүний хувийн ашиг сонирхол нийтийн ашиг сонирхолтой зөрчилдөх болон албан үүргээ тэгш, шударгаар хэрэгжүүлэхэд харшаар нөлөөлж болохуйц нөхцөл байдлыг ойлгоно" гэж хуульд гэж заасан байдаг. Тэгвэл түүний засгийн газарт ашиг сонирхлын зөрчилтэй сайд нарын толгойд
Хүнс, хөдөө аж ахуй, хөнгөн үйлдвэрийн сайд Ж.Энхбаяр бий. Түүнд уг салбарт үйл ажиллагаа явуулдаг нэг биш нилээн хэдэнг компани бий. Тодруулбал, “Газар” ХХК-ийг 100 хувь, “Газар буудай” ХХК, “Газар шим” ,“Газар капитал партнерс” ББСБ-ын 74 хувийг эзэмшдэг байна. Сайд болохоосоо өмнө ч уг компаниудаараа төрөөс нилээдгүй их хөнгөлөлт, урамшуулал авдаг байсан нийтэд ил байдаг. Гэтэл Ерөнхий сайд эрх мэдлийн хүрээнд энэ хүнийг томилчихсон.
2. Зам тээврийн сайд Б.Дэлгэрсайхан
20 дугаар зууны үеэс л Сэлэнгийн төмрийн хүдрийг зөөж, хувийн хөрөнгөөрөө төмөр зам тавьсан түүнийг “Болд төмөр Ерөө гол” ХХК-иар нь мэдэхгүй, танихгүй хүн Монголд байхгүй. Гадаадад ялангуяа Хятадад Дэлгэрсайхан ба Болд төмөр Ерөө гол хоёрыг нэг голын салшгүй 2 эрэг гэдэг. Мөн түүний эзэмшлийн “Монголиан транс ложистик” ХХК, “Монголиан транс лайн” ХХК Зүүнбаян-Ханги чиглэлийн төмөр замд хөрөнгө оруулж, барьсан. Ингэхдээ барих-ашиглахшилжүүлэх концессын гэрээг 20 жил эзэмшигч нь болсон. Товчхондоо хувьдаа төмөр замтай хүнээр Зам тээврийн сайд хийлгэж буй нь яах аргагүй ашиг сонирхлын зөрчил юм.
3. Хот байгуулалт, Барилга орон сууцжуулалтын сайд Ж.Батсуурь.
Сүхбаатар аймгийн Засаг дарга байхдаа төсвийн хөрөнгийг үргүй зарцуулсан гэх 8,9 тэрбум төгрөгийн хэрэг нь өнөөдрийг хүртэл “боолттой” хэвтэж байгаа ч Ардчилсан намын жагсаалтаар сонгогдож, удалгүй сайд болсон азтай хүн. Түүний эгч болон хүү нь барилгын компанитай бөгөөд Сүхбаатар аймгийн Баруун-Урт сумын түрээсийн орон сууцны барилгын гадна дулааны шугамын зураг төсөл, Сүхбаатар аймгийн Баруун-Урт сумын түрээсийн орон сууц дөрвөн блок барилгын гадна ус хангамж, ариутгах татуургын шугам сүлжээний зураг төслийн ажлыг хийж байжээ.
Эрчим хүчний сайдаар улиран томилогдсон Б.ЧОЙЖИЛСҮРЭН: Сайжруулсан түлшний туршилтыг дүүрэг сонгон хийж нийслэлчүүдийг туршилтынхаа “амьд туулай” болгож байсан энэ хүн Л.Оюун-Эрдэнийн Засгийн газарт хэр хэмжээний лидер байасан бэ?
Зөвшөөрөл авалгүй барилга барихдаа хуулийг ч уландаа гишгэсэн энэ хүн ямар их ашиг сонирхлын зөрчилтэйг барилгынхан андахгүй. Эрчим хүчний сайдаар энэ салбарт ямар ашиг сонирхлоо гүйцээх гэж дахин улирсныг салбарынхан бүгд ярьдаг. Гэтэл ийм хүнийг Танхимдаа багтаан тохой нийлүүлэн суусан Ерөнхий сайд авилгачидтай тэмцэх биш андууд болсон харагддаг.
Гэх мэтчилэн тоолоод байвал ашиг сонирхлын зөрчилгүй хүн тун цөөхөн. Ямартай ч шинэ засаг ч байна уу. хуучин засаг ч байна уу энэ мэт хүмүүсээ цэвэрлэмээр байна. Ерөнхий сайд аа.
