УИХ дахь АН-ын бүлэг өнөөдөр хуралдаж, УИХ-ын гишүүн Ж.Баярмаа болон Ерөнхий сайд Л.Оюун-Эрдэнийн хооронд үүссэн маргаанаас болж УИХ-ын үйл ажиллагаанд үл оролцох "бойкотоо" зогсоосноо мэдэгдэж сэтгүүлчдэд мэдээлэл хийсэн юм. Энэ үеэр УИХ-ын гишүүн Х.Тэмүүжин энэхүү үйл явдлыг гүйцэтгэх эрх мэдэл нь хууль тогтоох эрх мэдлийнхээ дээр гарч толгой дээр нь суусантай холбон тайлбарлаж цаашид үүнийг засч залруулах хуулийн төсөл санаачлан өргөн барихаа мэдэгдсэн. Түүний ярьсныг фокуслан хүргэвэл,
-Өнгөрсөн долоо хоногт өрнөсөн үйл явдал Засгийн газар буюу гүйцэтгэх эрх мэдэл хууль тогтоох эрх мэдлийн хоорондын хил хязгаар эвдэрсэн УИХ-ын толгой дээр ЗГ нь гараад суусан гэдгийг ил тод харуулсан үйл явдал болсон. Уламжлалт байдлаар дарга нараа шүтдэг арга барилаараа төрийн ёслолын албанаас зохион байгуулсан юм уу яасан юм, УИХ-ын чуулганы танхимын хойморт сандал ширээ засч суулгаад амьдрал дээрээ гурван даргын улс болгоод хувирчихсан. Энэ байдлыг бид халах, засах ёстой.
Төрийн гурван өндөрлөг гэх хуулийн нэр томъёо Монголд огт байхгүй. Үндсэн хуульд ийм албан тушаал огт байхгүй. Үүнийг засахын тулд эхний ээлжид парламент нь парламент шиг болох ёстой. Парламентын толгой дээр гараад суучихдаг Ерөнхий сайд байж болохгүй. Ерөнхий сайд 126 гишүүний нэг бол гишүүдийнхээ дунд суух ёстой. УИХ-ын дарга нь УИХ-аас илүү эрх мэдэл эдэлж ҮАБЗ-д ордгийг мөн болиулах хуулийн төслүүдийг өргөн барина гэв.
