Нийслэлийн Засаг даргыг ард иргэдийн шууд сонгуулиар сонгодог болох өргөдөлд гарын үсэг цуглуулж эхэлжээ. Тус өргөдлийг Сэржмядагийн Түвшинбилэг гэх иргэн санаачилсан байна.
Гарын үсгийг 2025 оны дөрөвдүгээр сарын 25-аас эхэлж цуглуулсан бөгөөд 2025 оны тавдугаар сарын 25-нд хаагдах аж.
Одоогоор энэхүү өргөдлийг 1036 иргэн дэмжиж, гарын үсгээ зураад байна. Тус өргөдөлд, Монгол Улсын нийслэл Улаанбаатар хотын даргыг ард иргэдийн шууд сонголтоор сонгодог болгох хуулийн шинэчлэлийн төслийг Монгол Улсын үндсэн хуулийн 58, 62 дугаар заалтууд, Сонгуулийн тухай хууль, Нийслэлийн эрх зүйн байдлын тухай хуулиудын заалтуудад шинэчлэн оруулах хуулийн төслийг УИХ-аар батлуулах шаардлагатай.
Улаанбаатар хотын даргыг сонгуулиар сонгодог болсноор ардчилал ба иргэдийн оролцоо нэмэгдэх, ил тод байдал хариуцлага сайжрах, хотын хөгжлийн бодлого тогтвортой болох төр засгаас хараат бус байх зэрэг олон давуу тал үүсэх тул хотын иргэд бид өөрсдийн амьдралд шууд нөлөөлөх энэхүү чухал албан тушаалыг өөрийн сонголтоор сонгох эрхээ олж авах шаардлагатай гэж үзжээ.
