Засагт хамтарсан бол бүх томилгоонд хамтрахыг шаарддаг бичигдээгүй хууль улс төрд үйлчилээд удсан. С.Баярын стандарт бус Засгаас эхэлсэн энэ жишиг Л.Оюун-Эрдэнийн танхимд ч үйлчилэх ёстойг ХҮН-ийн төлөөлөл УИХ-ын гишүүн Б.Найдалаа өнөөдөр хэвлэлийнхэнд мэдээллээ.
Засагт хамтарснаараа нэг шадар сайд, нэг яамыг "өмчилж" авсан ХҮН-ийнхэн УИХ-д зургаан гишүүнтэй. Хамгийн боловсролтой, сэхээтэнлэг хэмээх имижийг бүрдүүлж хэдхэн жилийн дотор улс төрд нөлөө бүхий нам болж чадсан. 2024 оны сонгуулийн үр дүнд хоёр дахь удаагаа парламентад орохдоо суудлынхаа тоог нэмж Засгийн газарт хүртэл хамтарсан билээ. Гэвч магтсан хүүхэн хуримгүй гэгчээр ХҮН намаас ихийг хүлээх хэрэггүйг өнөөдрийн Б.Найдалаа гишүүний мэдээллээс харж болохоор байна. Тэрбээр Засгийн газар төрийн өмчит компаниудад бүтээмжийн болон хяналтын менежер гэх албан тушаалыг бий болгож УИХ-ын экс гишүүд болон МАН, АН-ын улстөрчдийг томилж буйтай "барьцаж" ХҮН намынхан ч үүнд багтах ёстой гэдгээ ил тодорхой мэдэгдлээ.
Уг нь төрийн албыг цомхон чадварлаг болгохын төлөө ажиллаж, Засгийн газрын "бялуу" хуваалтын эсрэг төсвийн мөнгийг хэмнэнэ гэж олон хүн ХҮН намаас хүлээж байсан. Гэтэл эсрэгээрээ энэ бялуунаас хуваалцсангүй хэмээн улс төр хийж буй нь ХҮН хүн биш болсныг харууллаа.
Хэрэв энэ мэтчилэн Засагт хамтрагч намууд эрх мэдэл албан тушаалын марафоноо үргэлжлүүлбэл төрийн өмчит бүртгэлтэй 122 компани ч тэдний томилгоонд багадахаар байна.
Эхний ээлжинд "Эрдэнэс Монгол" ХХК-ийн мэдлийн найман компанид тус бүр хоёр менежер томилохоо гүйцэтгэх захирал С.Наранцогт мэдэгдсэн. Үүнээс хэдийг нь ХҮН нам авах гэж ямар шаардлага тавихыг өнөөдөр хуралдах ХҮН намын Үндэсний зөвлөл шийдэх бололтой.
