ОУОХ-ны ерөнхийлөгч Томас Бах “Милан, Кортина 2026” өвлийн XXV олимпын наадмын урилгыг МҮОХ-нд албан ёсоор ирүүлжээ. “Милан, Кортина 2026” олимп Италийн Милан болон Кортина-ди-Ампеццо хотод 2026 оны хоёрдугаар сарын 6-22-нд болох юм. Монголын баг тамирчид “Инсбрук 1964” олимпод анх оролцсоноос хойш нийт 15 удаагийн наадамд гүйлтийн цана, биатлон, шорт трейк, гүйлтийн тэшүүрийн төрлөөр оролцсон түүхтэй. Тэгвэл дээрх дөрвөн төрлөөр 2026 оны өвлийн олимпод өрсөлдөх боломжтой гэж үзэж байна. Харин ОУОХ-оос хэрэгжүүлж буй “Милан, Кортина 2026” тамирчдын тэтгэлэгт хөтөлбөрт цаначин Б.Ачбадрах, Т.Ариунболд, О.Золбаяр, тэшүүрчин Б.Гэрэлтуяа нар хамрагдаж, олимпын өмнөх бэлтгэл цугларалт, амин дэм, витаминжуулалт, дасгалжуулалтын зардалд тодорхой санхүүжилт авч байгаа юм.
