УИХ-ын дарга Д.Амарбаясгалан Ховд аймгийн Алтай суманд өнөөдөр ажиллажээ. Тэрбээр уулзалтын үеэр ""Алтай сумынхан Улаанбаатар хотоос 1500 гаруй км-ийн цаана амьдарч буй иргэдийнхээ санал хүсэлтийг сонсож буйд талархалтай байна. Алтай сум бол хилийн Булган боомтоос 135 км зайтай бөгөөд боомтын хөгжлийн талаар иргэд санал хүсэлтээ илэрхийлж байна. Энэ боомт бол дан ганц Ховд аймаг гэлтгүй баруун бүс нутгийн боомт гэдэг зургаар нь харж, бүсийн иргэд худалдаа эрхлэх, зах зээлээ өргөжүүлэх боломж бүрдүүлэхэд анхаарна. Түүнчлэн, залуус хэрэглээний зээл авч, жижиг бизнес эрхлэх гэхээр банкны зээлийн хүү өндөр байгаад шүүмжлэлтэй хандаж байна. Шинэ парламент Гурван төгөлдөршил бодлогын хүрээнд банк, санхүүгийн салбарын шинэчлэлийг хэрэгжүүлж, зээлдэгчийн эрх ашгийг хамгаалсан, тэдэнд боломж олгосон, зээлийн хүүг бодитой түвшинд бууруулах эрх зүйн орчинг бүрдүүлэхийг зорьж ажиллана" гэжээ. Түүнтэй хамт УИХ-ын гишүүн Э.Болормаа иргэдийн уулзалтад оролцжээ.
