АНУ-ын Төрийн департамент гадаад тусламжийн хөтөлбөрийн ихэнх санхүүжилтийг, тэр дотроо Украинд үзүүлдэг тусламжийг 90 хоногийн хугацаатай зогсоолоо.
Израиль, Египетэд үзүүлдэг зэр зэвсгийн санхүүжилтийг хөндөлгүй үлдээжээ. Гадаад улс төрийн нэн тэргүүний зорилтуудаа эргэн харах шаардлагын үүднээс ийм шийдвэр гаргасан хэмээн Вашингтоны эрх баригчид тайлбарлаж байна.
Тусламжийн хөтөлбөрийн санхүүжилт царцсанаар АНУ-ын Олон улсын хөгжлийн агентлагийн (USAID) үйл ажиллагаа зогсож, эмнэлгийн үйлчилгээ, ДОХ-ын эмчилгээ, хоол хүнс, эх хүүхдийн эрүүл мэнд, хөдөө аж ахуйн бизнес, иргэний нийгэм, боловсролыг дэмжих хөтөлбөрүүд тасалдана. Өөрөөр хэлбэл, эмх замбараагүй байдал газар авна хэмээн тоймч, ажиглагчид үзэж байна.
