Монголын Өмгөөлөгчдийн Холбооны ерөнхийлөгч Л.Данзанноров, Парламентын судалгаа, хөгжлийн хүрээлэнгийн захирал Д.Бумдарь, нар 2024 оны 12 сарын 19-ний өдөр хамтран ажиллах санамж бичигт гарын үсэг зурлаа.
Хоёр байгууллага санамж бичгийн хүрээнд хүний эрхийн хэрэгжилтийн байдал, хууль тогтоомжийн нийгэмд үзүүлэх эерэг, сөрөг нөлөөлөлийн талаар судалгаа шинжилгээ, үнэлгээний ажлуудыг гүйцэтгэх, Улсын Их Хурлаас батлагдан гарч байгаа хууль тогтоомжийг иргэдэд сурталчлан таниулах, сургалт, хэлэлцүүлгийн арга хэмжээ зохион байгуулах, хууль эрх зүйн гарын авлага бэлтгэх, өмгөөллийн үйл ажиллагааны үр нөлөөг сайжруулах зэрэг чиглэлүүдээр хамтран ажиллахаар тохиролцлоо.
Тус арга хэмжээнд Монгол Улсын Их Хурлын дарга Д.Амарбаясгалан, Хууль зүйн байнгын хорооны дарга Д.Цогтбаатар, Хууль зүй, дотоод хэргийн сайд О.Алтангэрэл, Монголын Өмгөөлөгчдийн Холбооны Удирдах зөвлөлийн дарга Б.Энхзаяа, Удирдах зөвлөлийн гишүүн Ч.Жадамба, Мэргэшлийн Хорооны дарга Д.Батсүх, Нийслэлийн Өмгөөлөгчдийн Зөвлөлийн дарга Т.Энхбаяр, өмгөөлөгч Б.Солонго нар оролцов.
Улсын Их Хурлын дарга Д.Амарбаясгалан “Монгол Улсын Их хурлын стратеги төлөвлөгөөнд хүн төвт, хүний эрх, эрх чөлөөг дээдэлсэн үзэл санааг төгөлдөржүүлнэ хэмээн заасан. Уг зорилтын хүрээнд хууль тогтоомжид хүний эрх, эрх чөлөө баталгаатай хангагдана гэж үзэж буй. Тиймээс хуульд хүн төвт үзэл баримтлалыг бий болгоход Монголын өмгөөлөгчдийн холбоо зэрэг мэргэжлийн байгууллагуудтай нягт хамтран ажиллах нь чухал” гэдгийг арга хэмжээний үед онцоллоо.
МОНГОЛЫН ӨМГӨӨЛӨГЧДИЙН ХОЛБОО
