Хүний папиллома вирусийн эсрэг вакцинжуулалтад улсын хэмжээнд 12.847 хүүхэд хамрагджээ. Тодруулбал, орон нутагт 8157, Улаанбаатар хотод 4690 хүүхэд хамрагдсан байна. Улсын хэмжээнд 11 настай 78.622 хүүхэд хамрагдах ёстой. Хүний папиллома вирусийн эсрэг вакциныг 2024 оны арваннэгдүгээр сарын 28-наас эхлэн ерөнхий боловсролын сургуулийн 11 настай хүүхдүүдэд хийж эхэлсэн. Уг вакциныг 14 хоног буюу арванхоёрдугаар сарын 5-ныг хүртэл сургуулиудаар дамжуулан хийсэн.
Дархлаажуулалтад 2013 онд төрсөн 11 настай охид, хөвгүүд нэг тунгаар хамрагдах бөгөөд сургуульд суурилсан дархлаажуулалтаас хоцорсон тохиолдолд харьяа өрх, сумын эрүүл мэндийн төв дээр хийлгэж болно гэдгийг албаныхан мэдээлсэн юм.
Ерөнхий Боловсролын сургууль болон өрх, сумын эрүүл мэндийн төвөөс вакцин хийх талаарх мэдээллийг эцэг, эх, асран хамгаалагч, харгалзан дэмжигч нарт өгч, вакцин хийх өдрийг мэдэгдсэний дагуу хүүхдээ вакцин хийлгэх өдөр дулаан хувцаслаж, хоол, цайг нь сайн уулган, вакцин хийлгэсний дараа дааруулахгүй, хүйтэн юм уулгахгүй, тарьсан хэсэг газрыг хөндөж, цохиж, маажихгүй байхыг хүүхдүүддээ зөвлөж хэлээрэй. Мөн хүүхэд зүү тариур, тарилгаас айх тохиолдол байдаг учир хүүхэдтэйгээ ярилцан ойлгуулж тайвшруулаарай.
Дархлаажуулалтыг зохион байгуулах өдөр эмч хүүхдийн биед үзлэг хийж үнэлэн вакцинд хамруулан, вакцин хийлгэсний дараа ажиглалтын өрөөнд 15-30 минут хянана.
ХПВ-ийн халдварын эсрэг вакцин нь бусад вакцины адил вакцин хийсний дараа тарьсан хэсэг газар хөндүүрлэх, хавдах, улайх, загатнах, хөхрөх, халуурах, толгой эргэх, дотор муухайрах, суулгах, бөөлжих зэрэг зовиур илэрч болох бөгөөд энэ нь өөрөө аяндаа арилна. Эдгээр шинж тэмдэг илэрсэнээр хүний дархлааны систем ажиллаж дархлаа тогтож байгааг илтгэж байгаа юм. Өөр бусад ямар нэгэн шинж тэмдэг 3-аас дээш хоног илэрвэл харьяа сум, өрхийн эрүүл мэндийн төвийн эмчид яаралтай хандахыг эмч нар зөвлөж байна.
