Хүчтэй цасан шуурганы улмаас Алматы-Оскемен чиглэлийн хурдны зам хаагдаж, Монголоос Алматы чиглэлд явж байсан автобус Аягөз хотын зогсоол дээр саатжээ. Тус автобусанд Монголын 19 иргэн, Казакстаны 4 иргэн,нэг хүүхэд сууж явсан байна.
13.00 цагийн байдлаар зорчигчдыг ойролцоох спорт сургуулийн дулаан байранд түр хүлээхийг санал болгосон ч зорчигчид автобусандаа үлдсэн мэдээлэл байна.
Казакстаны урд бүсийн олон хотод цаг агаар эрс хүйтэрч цасаар шуурснаас Алматы хотыг чиглэн явж байсан өөр нэг автобус Уржар дүүрэг дэх Алматы-Семей хурдны зам дээр зогсож, замын энэ хэсэгт алба хааж байсан цагдаагийн ажилтнууд тэр даруй хариу арга хэмжээ авч, хоёр жолооч, 38 зорчигчийг Таскескен тосгоны сүмийн дулаан цэгт хүргэсэн байна. Ийнхүү алба хаагчид шуурхай ажилласны үр дүнд зорчигчдыг эрсдэлтэй нөхцөл байдлаас аварчээ.
