Эрүүл мэндийн салбарын ажилчид өнөөгийн нийгэмд амьдарч болохуйц цалин хөлс авч хөдөлмөрөө шударгаар үнэлүүлмээр байна гэсэн шаардлага тавьж ажил хаялт зарлахаар болсон билээ. Тэгвэл 24 цагийн турш иргэддээ эмнэлгийн түргэн тусламжийг цаг алдалгүй түргэн шуурхай хүргэдэг Нийслэлийн түргэн тусламжийн төв нь уг ажил хаялтад оролцохгүй харин цалин хөлс нэмэгдүүлэх санал, санаачилгыг бүрэн дэмжиж байгаа хэмээн мэдэгдэл гаргалаа
Уг мэдэгдэлдээ: Нийслэлийн түргэн тусламжийн төв нь Нийслэлийн 6 дүүргийн иргэдээс ирүүлсэн дуудлагад цаг алдалгүй газар дээрх болон эмнэлэг хүртэлх түргэн тусламжийн үйлчилгээг 24 цаг тасралтгүй үзүүлэн хоногт дунджаар 1600-2100 дуудлагад эмч, жолооч, ахлах эмч, дуудлага хүлээн авагч, бусад инженер техникийн ажилчидтайгаар багаар үйлчлэн ажилладаг.
Монголын Эрүүл мэндийн ажилтны үйлдвэрчний эвлэлийн холбооноос дэвшүүлсэн ажилчдын цалин хөлсийг нэмэгдүүлэх санал, санаачилгыг бүрэн дэмжиж байгаа ч иргэдээс ирүүлсэн гэнэтийн цочмог өвчин эмгэг, осол, гэмтэл, хордлого, жирэмсэн, төрөх, амь тэнссэн үеийн яаралтай тусламжийг үзүүлдэг байгууллага тул иргэдийн эрүүл мэнд, амь насанд учирч болох эрсдэлээс урьдчилан сэргийлэх үүргийн хүрээнд ажил хаялтад оролцохгүй болохыг мэдэгдэж байна гэжээ
