“Завсрын” гэх тодотголыг улс төрийн хүрээнийхэн дунд өгсөн Г.Занданшатарын Засгийн газрыг ганхуулах шалтгийг ЗГХЭГ-ын дарга С.Бямбацогт эхлүүлээд байна. Ирэх есдүгээр сарын 01-нд Улс төрийн зөвлөлөө хуралдуулахаар товлосонтой зэрэгцээд ИЗНН хамтарсан Засгийн газраас гарахаа албан бусаар мэдэгдсэн.Энэ нь сүрдүүлэг гэхээсээ улс төрийн том тоглолтод шалтаг өглөө гэж үзэж болохоор байна.
АН-ыг Засгаас “хөөж” ИЗНН-ыг орууулж ирэн БОУАӨЯ-ыг өгснөөр МАН хамтарсан нэр зүүсэн. Шалдан ганц сайдаас өөр эрх мэдэлгүй шахам Б.Батбаатарын хувьд яамныхаа гал тогоо, мөнгө санхүүг барьдаг Төрийн нарийн бичгийн даргатайгаа ойлголцохгүйгээр Засагт хамтарсан нэр зүүхээс өөр ямар ч ашиггүй нь үнэн билээ. Тэрийгээ ч Б.Батбаатар илэрхийлж, “МАН энэ яамаа өгсөн шиг өгч чадахгүй бол Засгийн газраас гарна” хэмээх мессэжийг тараалгасан. ТНБД-аараа төрийн албаны шалгуур, шаардлагыг үл хангах хүнийг томилохыг шаардаж тулгаж буй. Үүнийг үл зөвшөөрч гэдийж байгаа нь ЗГХЭГ-ын дарга С.Бямбацогтыг Төрийн албаны хуулиа мөрдөж байгаа мэт харагдуулж буй боловч үүний цаана улстөрчийн том нүүдэл нуугдаж байгаа нь удахгүй ил болж мэдэхээр байна.
Яамны Тусгай хамгаалалттай газар нутгийн бодлогын хэрэгжилтийн газрын даргын албан үүргийг түр орлон гүйцэтгэгч, АН-ын гишүүн С.Бямбацогтын баз хүргэн Д.Батцогтыг халах, чөлөөлөх нь түүний хувьд 80 дахь магадгүй 100 дахь эрх ашиг нь юм
С.Бямбацогтын хувьд эрх баригч намд гол хүч болсон Ерөнхийлөгч У.Хүрэлсүхийн ойрын хүн. Тус фракцийн гол санхүүжүүлэгч нь гэж ярьдаг. Тиймээс Ерөнхий сайд болгочоод МАН-ын фракцуудтай ойлголцоход Г.Занданшатараас илүү нэмэртэй гэж хавраас хойш өрнөсөн улс төрийн үйл явц харуулаад байгаа бололтой.
