Худалдаа, эдийн засаг, шинжлэх ухаан, техник, соёлын хамтын ажиллагааны Монгол, Киргизийн ЗГХК-ын V хуралдаан Бүгд Найрамдах Киргиз Улсын нийслэл Бишкек хотноо амжилттай болж өндөрлөлөө.
Хуралдааны үеэр талууд худалдаа, эдийн засгийн хамтын ажиллагааг өргөжүүлэх, тэр дундаа хөдөө аж ахуй, мал аж ахуй, хөнгөн үйлдвэрлэл, аялал жуулчлал, мах, махан бүтээгдэхүүн, арьс шир, ноос ноолуурын экспортын чиглэлээр хамтран ажиллахаар санал нэгдлээ. Үүнээс гадна боловсрол, шинжлэх ухаан, мэдээллийн технологи, хөдөлмөр, нийгмийн хамгааллын салбаруудад хамтын ажиллагааг улам бүр гүнзгийрүүлэхээр тохиролцов. Мөн Монгол Улсын Ергөнхийлөгч У.Хүрэлсүхийн Киргиз Улсад хийхээр төлөвлөж буй айлчлалын бэлтгэл, ач холбогдлын талаар санал солилцлоо. Тус айлчлал нь хоёр улсын худалдаа, эдийн засгийн хамтын ажиллагааг цаашид өргөжүүлэн хөгжүүлэх, хэтийн төлөв, чиглэлийг тодорхойлох чухал алхам юм.
Мөн үеэр онцгой байдлын албаны хүрээнд гамшгаас урьдчилан сэргийлэх, хариу арга хэмжээ авах, аюулгүй байдлыг хангах чиглэлээр хамтын ажиллагааг хөгжүүлэх, холбогдох байгууллага хооронд шууд харилцаа тогтоох, туршлага солилцох боломж бүрдүүлэхийг хоёр тал чухалчилж, санал нэгдлээ.
Монгол, Киргиз улс нь түүх, соёл, уламжлалын гүн гүнзгий хэлхээ холбоотой, харилцан ойлголцол, итгэлцэлд суурилсан найрсаг харилцаатай бөгөөд бүс нутгийн түвшинд далайд гарцгүй хөгжиж буй орны хувьд хөгжлийн туршлагаа хуваалцах, олон салбарт харилцан ашигтай хамтын ажиллагааг гүнзгийрүүлэх өргөн боломжтойг талууд тэмдэглэв.
