Уругвайн ерөнхийлөгч асан Jose Alberto Mujica Cordano “Пепе” 89 насандаа таалал төгслөө. Нас барах шалтгаан нь одоогоор тодорхойгүй ч улаан хоолойн хорт хавдартай байсан нь мэдэгдэж байна.
Jose Mujica нь 2010-2015 онд төр барьсан бөгөөд дэлхийн хамгийн “ядуу” ерөнхийлөгч хэмээгдэн олон улсад танигдав. Тэрээр цалингийнхаа 90 хувийг буяны үйлсэд хандивладаг байсан бөгөөд эхнэрийнхээ хуучин усны шугамд холбогдоогүй фермийн байшинд, гурван хөлтэй нохой, эхнэрийнхээ хамт амьдарч 1987 онд үйлдвэрлэгдсэн Volkswagen Beetle машин унаж, тарьсан ногоогоо хэрэглэж, улсынхаа эмнэлэгт иргэдтэйгээ адил дугаарлан үйлчлүүлдэг байсан нь түүний даруухан амьдралын илэрхийлэл байв.
1960-аад онд зүүний үзэлтэй Tupamaros хөдөлгөөнийг үүсгэн байгуулж, хэд хэдэн удаа баривчлагдан шоронд орсон боловч удаа дараа оргож байжээ. Нэг орголт нь Уругвайн шоронгийн түүхэнд хамгийн томд тооцогдон үлджээ.
Jose Mujica улс төрийн замналдаа 2005 онд сайдаар томилогдож, 2010 онд 74 насандаа Ерөнхийлөгч болсон. Тансаг ордноос татгалзаж, ард түмэнтэйгээ энгийн амьдралаар амьдарч, мөн хувийн онгоцноос татгалзаж оронд нь орчин үеийн аврах нисдэг тэрэг авч иргэддээ хандивласан нь дэлхийд “өр зөөлөн удирдагч”-ийн жишээ болгож үлдээсэн юм.
