УИХ-ын гишүүн бүрэн эрх дуусгавар болсноос хойш ажил эрхлээгүй бол 12 сарын хугацаанд гишүүний үндсэн цалинтай тэнцэх хэмжээний тэтгэмж, бага цалинтай ажилд орсон бол цалингийн зөрүүтэй тэнцэх хэмжээний тэтгэмж авах хуулийн заалтыг иргэд эсэргүүцэж эхлээд байгаа.
Үүнтэй холбогдуулан УИХ-ын Ерөнхий нарийн бичгийн дарга Б.Баасандорж мэдээлэл өгөв.
Тэрээр "Иргэдийн дунд энэ тухай асуудал нэлээн өрнөлөө. УИХ-ын гишүүнийг иргэн сонгодог. Нөгөө талаараа УИХ-ын гишүүн бол сонгогддог албан тушаал. Анх 1992 онд Монгол Улсын их хурлын тухай хуулийг баталсан. Энэ хуульд гишүүний эрх зүй, нийгмийн баталгаатай холбоотой заалт оруулсан.
Уг хуульд УИХ-ын гишүүний бүрэн эрхийн хугацаа дууссан, эрүүл мэндийн шалтгаантай тохиолдолд өмнө нь эрхэлж байсан албан тушаалд эргүүлэн тавина. Энэ нь боломжгүй бол түүнтэй дүйцэхүйц албан тушаалд тавина гэсэн заалт 1997 он хүртэл мөрдөгдөж байсан.
2006 оны УИХ-ын тухай хуулийн өөрчлөлтөөр УИХ-ын гишүүний бүрэн эрхийн хугацаа дууссан тохиолдолд дахин сонгогдоогүй болон эрүүл мэндийн шалтгаантай тохиолдолд нэг удаагийн мөнгөн тэтгэмж буюу 12 сар хүртэлх цалинтай дүйцэхүйц тэтгэмж олгодог. 2024 онд тус хуулийн шинэчилсэн найруулгын:
41.9.Хэрэв гишүүн бүрэн эрх дуусгавар болсноос хойш ажил эрхлээгүй бол 12 сарын хугацаанд гишүүний үндсэн цалинтай тэнцэх хэмжээний тэтгэмж, бага цалинтай ажилд орсон бол цалингийн зөрүүтэй тэнцэх хэмжээний тэтгэмж, гишүүнээр сонгогдохоосоо өмнө оршин сууж байсан газартаа шилжвэл өөрийнх нь болон гэр бүлийн гишүүний замын зардал, ачаа, тээшний хөлсийг авто тээврийн тарифаар тооцож олгоно гэж заасан. Энэ хуулийг өмнөх парламент баталсан. Одоогийн байдлаар 30 гаруй гишүүн хүсэлтээ өгсөн бөгөөд эхний сарын тэтгэмжээ авсан" гэв.
