Хүүхэд, гэр бүлийн хөгжил, хамгааллын ерөнхий газар, ШУТИС-ийн Бизнесийн удирдлага, Хүмүүнлэгийн сургуультай хамтран Монгол Улсад хүүхдийн байгууллага үүсч хөгжсөний 100 жилийн ойг угтан их, дээд сургуулиудын оюунуудын дунд “ХҮҮХЭД, ГЭР БҮЛИЙН ХӨГЖИЛ, ХАМГААЛАЛ” сэдэвт эрдэм шинжилгээний бага хурлыг өнөөдөр зохион байгуулж байна.
Уг эрдэм шинжилгээний бага хурлыг жил бүр зохион байгуулдаг бөгөөд энэ жил илүү өргөн цар хүрээнд буюу Монгол Улсад хүүхдийн байгууллага үүсч хөгжсөний 100 жилийн ойг угтан зохион байгуулж байгаагаараа онцлог юм.
Хурал 2 үе шаттай явагдсан бөгөөд нийт 13 их дээд сургуулийн 69 илтгэл, 110 оюутан тус хуралд бүтээлээ ирүүллээ.
Хүүхэд, гэр бүлийн хөгжил, хамгааллын ерөнхий газрын дарга Т. Ихтамир хурлыг нээж хэлсэн үгэндээ: “Илтгэлүүдэд хүүхдийн эрх, хүүхэд хамгаалал, гэр бүл төлөвлөлт, залуу гэр бүлийн асуудал гэсэн сэдвүүд зонхилж байна. Үүнээс гадна эцэг эх, хүүхдийн харилцааны асуудал, хүүхдийн хүмүүжил төлөвшлийн асуудлыг хөндсөн илтгэлүүд ирсэн нь тус сэдэв өнөөгийн нийгэмд чухлаар тавигдаж байгааг харуулж байгаа юм.
Энэ удаа бид бакалаврын түвшний оюутнуудын дунд ЭШБХ зохион байгуулж байгаа бол цаашид магистр, докторын түвшинд, мөн энэ салбарт ажиллаж байсан болон ажиллаж байгаа эрдэмтэн судлаачдын дунд зохион байгуулахаар төлөвлөж байна.
Гол нь хурал, зөвлөгөөн хийгээд орхих биш шинжлэх ухааны үндэслэлтэйгээр дэвшүүлж байгаа асуудлуудыг бодлогын түвшинд шийддэг байх, ажилдаа тусгадаг байхыг чухалчилна” гэлээ.
