УИХ-ын чуулганы үдээс хойших хуралдаан үргэлжилж байна. Хуралдаанаар Засгийн газрын ирэх онд хэрэгжүүлэх ажлын төлөвлөгөөг хэлэлцэж байна.
УИХ-ын гишүүн Н.Батсүмбэрэл “Улсын хэмжээнд аймгийн төвтэйгээ ойрхон, нэгтгэж болох 21 сумыг татан буулгах шаардлагатай. Жишээ нь Булган аймгийн төвд Булган сум бий. Орхон аймгийн төвд мөн адил. Нэг байршилд ийм давхардал байх хэрэгтэй юу? 21 аймгийн төвд байгаа сумдыг татан буулгаснаар 81 хүн, 441 иргэдийн хурлын төлөөлөгч, 530 даргын зардлыг хэмнэнэ. Ингэснээр дарга даамлын давхардал багасна. Бүсчилсэн хөгжлийн бодлогыг боловсруулахдаа үүнийг судалсан уу?” гэж асуув. Түүний асуултад хариулахдаа
ЗГХЭГ-ын дарга Н.Учрал: Засаг захиргаа, нутаг дэвсгэрийн тухай хуульд энэ талаар заасан. Энэ хуулийг өөрчлөх нь Үндсэн хуулийн асуудал тул Засгийн газар дангаараа шийдэхгүй. Гэхдээ хамтарсан Засгийн газрын байгуулсан гэрээнд орон нутгийн удирдлага бие даан ажиллах нөхцөлийг бүрдүүлнэ гэж заасан. Ер нь эрх мэдлийн төвлөрөл бий болсон нь үнэн. Төр нэг сувгаар ярьж чадахгүй болсон. Хороо иргэдэд анхан шатны үйлчилгээ үзүүлэх нэрээр ихээхэн эрх мэдэлтэй болсон.ЭЗХЯ-ны Төрийн нарийн бичгийн дарга И.Батхүү: Манай улсын 90 байршилд хөрөнгө оруулах нь илүү ашигтай гэсэн тооцоо гарсан.
Тэргүүн шадар сайд бөгөөд Эдийн засаг, хөгжлийн сайд Л.Гантөмөр: Бүсийн хөгжлийн төлөвлөлтийг гаргасны дараа бүсүүдийн төрөлжилтийг тодорхойлно. Түүний дараа засаг захиргааны нэгжийн өөрчлөлтийн асуудал хөндөгдөнө. Тэр үед сумдыг татан буулгах, өөрчлөх асуудал яригдах боломжтой.
Хот тосгоны эрх зүйн байдлын тухай хуулийн төслийг боловсруулахаар ажлын хэсэг байгуулжээ. Ажлын хэсгийг УИХ-ын гишүүн Ж.Алдаржавхлан ахалж байна гэж хариулав.
