МоАХ-ны газрыг барьцаалсан баримт энэ байна Х.Баттулгаа!

Тамгагүй АН-аас зарласан даргын сунгаанд 500 сая төгрөгийн дэнчин тавьж нэр дэвшсэн Х. Баттулга сэтгүүлчийн асуултад худал мэлзсэнээр сурталчилгааны ажлаа эхлүүлэв. 

Сэтгүүлч Н.Өнөрцэцэг МоАХ-ны газрыг барьцаалаад “Пирамид-Орд” компани Хөгжлийн банкнаас зээл авсан талаар асуухад “Юу гэж дээ. МоАХ-ны алган чинээ газар дээр 50 тэрбум төгрөг өгдөг тэнэг банк гэж байхгүй. Худлаа гүтгэлэг” гэхээс өөр зүйл хэлж чадсангүй. Таны худал гүтгэлэг гэж худлаа хэлснийг нотлох баримтыг дэлгэе. Х.Баттулгын гарын үсэг, тамгатай, 2015 оны 1-р сарын 17-ны МоАХ-ны Удирдах зөвлөлийн 1 тоот тогтоол буюу хөдөлшгүй баримтыг үгүйсгэх боломжгүй юм. 

“Хан-Уул дүүргийн 10-р хороонд байрлалтай МоАХ-ны эзэмшил газарт “Пирамид-Орд” ХХК-иар орон сууцны барилга барихыг зөвшөөрсүгэй” гэж цагаан дээр хараар, цаасан дээр мөртэй үлдсэн баримт нь энэ байна. Х.Баттулгын хэлснээр алгын чинээ газар гэдэг нь 10 мянган ам метр талбайтай МоАХ-ны нэр дээр 2013 онд гарсан газрын гэрчилгээтэй юм. 

“Пирамид-Орд” компани нь Хөгжлийн банкаас 296 айлын орон сууц барихаар 2015 онд 15 сая долларын зээл авснаас өнөөдөр 23,2 тэрбум төгрөгийн өртэй байгаа юм. Барилгын гүйцэтгэгч Бэсон компанийн захирал Д.Батжаргал ажлын хөлс 4 тэрбум төгрөгөө авч чадахгүй, 4 жил хонгилын хууль, шүүхийн ханыг мөргөж, өр ширэнд баригдаж, өвчний группэд орсноо хоолой чичрүүлэн ярьсан. Пирамид-Орд компанийнхан Батжаргалд ердөө 250 мянган төгрөг өгсөн баримтан дээр тэг нэмж 250 сая төгрөг өгсөн мэтээр аашилж байсныг цагдаа шалгаж байсан гэх зэрэг ноцтой зүйлсийг тэрбээр өчдөг. 

АН-ын тамгагүй даргын сунгаагаа Х.Баттулга ийнхүү Хөгжлийн банкны асуултанд бүдэрч эхлүүллээ. МоАХ-ны партизануудад байр өгнө гэж газар өмчилж, зээл авсан энэ хэрэг явдлын үр дагаварт өнөөдөр 296 айл ордергүй, Хөгжлийн банк 23,2 тэрбумын өртэй үлдээд байна.