НҮБ-ын Хүнс, хөдөө аж ахуйн байгууллагын Монгол дахь суурин төлөөлөгч Винод Ахужа манай улсад ажиллах бүрэн эрхийн хугацаагаа дуусгаад буцах болсонтой холбогдуулан Монгол Улсын Шадар сайд С.Амарсайхан өнөөдөр (2024.09.19) түүнийг хүлээн авч уулзлаа.
Ноён Винод Ахужагийн Монголд ажилласан зургаан жилийн хугацаанд НҮБ-ын ХХААБ-тай хамтын ажиллагаа илүү гүнзгийрэн хөгжиж, манай хүнс, хөдөө аж ахуйн салбарын өөрчлөлт шинэчлэл, Тогтвортой хөгжлийг хангахад түлхэц болохуйц томоохон төсөл, хамтын ажиллагааг эхлүүлсэн гэдгийг Монгол Улсын Шадар сайд С.Амарсайхан уулзалтын эхэнд онцолсон юм.
Мөн тэрбээр "Монгол Улсын Засгийн газраас Хөдөөгийн хөгжилд онцгой ач холбогдол өгч, энэ салбарын 240 гаруй мянган айл өрхийн амьжиргааг дээшлүүлэх, тогтвортой орлоготой байх боломжийг бүрдүүлэхээр “Шинэ хоршоо” хөдөлгөөнийг орон даяар эхлүүлээд байгаа. Уур амьсгалын өөрчлөлтөөс үүдэлтэй аливаа эрсдэлээс сэргийлэх, урьдчилан мэдээлэх системийг хөгжүүлэх, хөдөө аж ахуйн салбарын гамшгийг тэсвэрлэх чадавхыг бэхжүүлэх, Эрсдэлийн даатгалын тогтолцоог нэвтрүүлэхэд цаашид ч НҮБ-ын ХХААБ-тай хамтран хэрэгжүүлэх ажил их бий.
Монгол Улсын Засгийн газраас “Олон нийтийн оролцоотой гамшгийн эрсдэлийг бууруулах үндэсний хөтөлбөр”-т тодорхой арга хэмжээг хэрэгжүүлэхээр тусгасны дотор “Гамшгийн эрсдэлийг бууруулах чадавхыг бэхжүүлэх түншлэл” (“КАДРИ) олон улсын хамтын ажиллагааны багаар Монгол дахь гамшгийн эрсдэлд үнэлгээ хийгээд байна" хэмээв.
Хэдийгээр ноён Винод Ахужа нутаг буцаж байгаа ч бидний боловсруулсан Стандартад суурилсан Гамшгийн эрсдэлийн стратеги болон Монгол Улсын Гамшгийн эрсдэлийг бууруулах системийг хөгжүүлэхэд өөрийн мэдлэг, туршлагаа бидэнтэй харамгүй хуваалцах болсонд мөн талархал илэрхийллээ.
Монгол Улсын гамшгийн эрсдэлийг бууруулах системийг хөгжүүлэх цогц арга хэмжээний хүрээнд дараах арга хэмжээг хэрэгжүүлэх саналыг хүргүүлсэн юм. Үүнд:
• Гамшиг, аюулт үзэгдэл, ослын үед иргэдийн аюулгүй байдлыг ханган ажилладаг байгууллагуудын холбооны бэлтгэл бэлэн дээшлүүлэх, зайнаас тандан судлах, GIS (газар зүйн мэдээллийн систем), цаг агаарын урьдчилан сэргийлэх мэдээллийн тогтолцоог хөгжүүлэх, сансрын хиймэл дагуулын болон цаг агаарын мэдээллийг шуурхай боловсруулах, хэрэглэгчдэд хүргэх чадвар бүхий Гамшгийн удирдлагын нэгдсэн системийн тогтолцоог байгуулах;
• Цаг агаарын аюул, гамшгийн үед үзэгдэлд суурилсан амжиж анхааруулах орон нутгийн мэдээг үүсгэж, аймаг, сумын төвөөс малчдад хүргэн түгээж, бэлэн байдалд орох боломж бүрдүүлэх зорилгоор орон нутгийн мэдээлэл холбооны эргэх холбоо бүхий цогцолборуудыг эрсдэл өндөртэй бүсүүдэд байгуулах;
• Малчин өрхүүдийг гамшиг, аюулт үзэгдэл, ослын мэдээ, мэдээллийг байнга, тогтмол хүлээн авдаг найдвартай эх үүсвэр бүхий хэрэгслээр хангах, байршил тогтоодог, мэдээллээ дамжуулдаг платформ, тоног төхөөрөмжийн хэрэглээг нэвтрүүлэх, ашиглалтыг жигдрүүлж хэвшүүлэх;
• Гамшгийн эрсдэлийн мэдээллийн санг (ган, зудын эрсдэлийн үнэлгээ зэрэг мэдээллийг агуулсан) хөгжүүлэх, мэдээллийг малчид, газар тариалангийн үйлдвэрлэл эрхлэгч аж ахуйн нэгжүүд болон бусад хэрэглэгч хүлээн авч, үйл ажиллагаандаа ашигладаг болох нөхцөлийг бүрдүүлэх мэдээллийн нээлттэй, хүртээмжтэй байдлыг хангах арга замыг хөгжүүлэх;
• Гамшгийн үед хэрэглэх зориулалттай нөөцийн бараа, материалын нэр төрөл, тоо хэмжээг нэмэгдүүлэх, бараа материалын хадгалалт, хамгаалалтыг сайжруулах зорилгоор хүнсний бүтээгдэхүүн, малын тэжээл хадгалах зориулалт бүхий улсын агуулахын аж ахуйг хөгжүүлэх зэрэг ажлууд багтсан.
