Боловсролын яам, Боловсролын ерөнхий газар, Google for Education-ийн албан ёсны түнш байгууллага болох iCORE E&C Co., Ltd хамтран хэрэгжүүлж эхэлж буй “Gemini Academy” хөтөлбөрийн нээлт боллоо.
Энэхүү хөтөлбөр нь багш нарын цахим ур чадварыг сайжруулах, хиймэл оюунд суурилсан шинэ технологийг боловсролын салбарт нэвтрүүлэх, багшийн ачааллыг бууруулах зорилготой юм.
Боловсролын сайд П.Наранбаяр нээлтийн үгэндээ “ Энэхүү академийн нээлт бол бидний хамтын ажиллагааны зөвхөн эхлэл юм. Google компанитай тогтоосон стратегийн түншлэлийн хүрээнд "Хүүхэд бүрд компьютер" хөтөлбөрийн тогтвортой байдлыг хангах чиглэлд хамтын ажиллагаагаа гүнзгийрүүлнэ. Хиймэл оюун ухаан бол зүгээр нэг технологийн дэвшил бус, харин бидний өмнө тулгарч буй сорилтуудыг боломж болгон хувиргах асар хүчтэй хэрэгсэл юм” хэмээн онцоллоо.
Арга хэмжээний үеэр 100 орчим багш дөрвөн төрлийн туршилт хичээлээр дамжуулан хиймэл оюун ашиглан хичээлээ төлөвлөх, сурагчдын оролцоо үйл явцыг хянах, хичээлд хэрэглэгдэж буй материалыг ашиглан сорилыг автоматаар боловсруулах гэх мэт хичээл заахаас бусад бүх өдөр тутмын ажлаа хөнгөвчлөх туршлагыг авч, биечлэн оролцлоо.
Хичээл заахаас бусад бүх үйл ажиллагааг хиймэл оюун ашиглаж хийх боломжтойг тус хөтөлбөр харуулж байна.
Багш нар хиймэл оюун ухаанд суурилсан шинэ технологийг эзэмшсэнээр ачааллаа 10 цагаар бууруулах боломжтой гэсэн судалгааны дүн гарчээ.
