“Шинэ хоршоо хөдөлгөөн”-ий хэрэгжилтэд дүн шинжилгээ хийх зорилгоор байгуулагдсан ажлын хэсгийн гишүүдийн төлөөлөлтэй уулзаж, тус хөдөлгөөний явц болон “Шинэ хоршоо хөдөлгөөн-2” арга хэмжээний хүрээнд хэрэгжүүлэх ажлуудын талаар санал солилцлоо. Уулзалтаар УИХ-ын гишүүн, ажлын хэсгийн ахлагч М.Мандхай “Шинэ хоршоо хөдөлгөөн”-ий өнөөгийн нөхцөл байдал, үр дүн, цаашид хэрэгжүүлэх бодлого, арга хэмжээнүүдийг танилцуулав.
Өнөөдрийн байдлаар улсын хэмжээнд нийт 10,048 шинэ хоршоо байгуулагдаж, 98,546 малчин тус хөдөлгөөнд хамрагдсан байна. Эдгээрээс 7,647 хоршооны 24,372 малчин нийтдээ 825 тэрбум төгрөгийн зээл авсан бөгөөд одоогоор 38.8 тэрбум төгрөгийн зээл эргэн төлөгдөөд байна. Олгогдсон зээлийн 70 гаруй хувь нь үржлийн мал худалдан авах зориулалтаар зарцуулагджээ. Гэсэн хэдий ч зээлийн зарцуулалт, ашиглалтад нарийвчилсан дүн шинжилгээ хийгдээгүй тул бодит үр дүнг үнэлэх боломжгүй байгааг М.Мандхай гишүүн онцолж, цаашид зээлийн зарцуулалтад хяналт тавих, үр ашигт суурилсан үнэлгээ хийх шаардлагатайг тэмдэглэлээ.
Дээрх асуудлуудтай холбогдуулан “Шинэ хоршоо хөдөлгөөн-2” арга хэмжээний бэлтгэл ажлыг хангах хүрээнд дараах үүрэг, чиглэлийг холбогдох албан тушаалтнуудад өглөө.
Үүнд:
• Шинээр байгуулагдах дундын хоршоодын тоог нарийвчилсан судалгаанд үндэслэн тодорхойлох, хэрэгжилтийн цар хүрээ, байршлыг бүсчилсэн байдлаар төлөвлөх;
• Санхүүжилтийн эх үүсвэр, төсвийн нийт хэмжээг нарийн тооцож, зээлийн дээд, доод хэмжээ, нөхцөл, шаардлагыг тодорхойлох;
• Аймаг, сумын түвшинд хэрэгжүүлэх ажлуудыг тухайн бүсийн онцлогт нийцүүлэн төлөвлөх, нутгийн хөгжлийн бодлоготой уялдуулах;
• Иргэд, хоршоологчдын дунд газар олголттой холбоотой мэдээллийн хүртээмжийг нэмэгдүүлэх;
• Сум бүрийн газар олголтын нөхцөл, зориулалт, хэмжээ зэрэг үзүүлэлтүүдийг тодорхой болгох үүрэг чиглэл өглөө.
