Цахим сургалтын төлбөрийг хөнгөлөхийг оюутнууд шаардаж байна

Цахим сургалтын төлбөрийг хөнгөлөх зорилготойгоор оюутан залуус нэгдэн цахим хөдөлгөөн өрнүүлж байна. Цахим сургалт танхимын сургалттай харьцуулахад чанаргүй байсны зэрэгцээ тог, цахилгаан болон бусад олон урсгал зардал хэмнэгдсэн байхад сургалтын төлбөрт уян хатан хандахгүй байгаа нь шударга бус зүйл гэж залуус үзэж байна. "Цар тахлаас шалтгаалан улс орон тэр чигтээ эдийн засгийн хүнд нөхцөлд орсон энэ цаг үед засаг төрөөс ард иргэддээ олон хөнгөлөлт, тусламж дэмжлэг үзүүлж байхад их, дээд сургуулиуд төлбөртөө уян хатан хандахгүй байгаа нь сэтгэлгүй байгаа нь харамсалтай бөгөөд шударга бус хэрэг. Боловсрол - ардчилсан, ялгаваргүй, хүртээмжтэй, чанартай, суралцагчдынхаа хэрэгцээ, шаардлагад нийцсэн байх ёстой" хэмээн уг хөдөлгөөнийг санаачлагч баг хамт олон үзэж байгаа юм. Солонгосын томоохон их дээд сургуулиуд тодруулбал, Ёнсэе, Сөүл их сургуулиуд цар тахлын үед цахимаар хичээл орсон учраас суралцаж буй мэргэжлээс нь хамаарч сургалтын төлбөрийн 40-60% буцаан олгож байна. Хоёр улирлын турш хүлээцтэй хандсан тэд ийнхүү #savestudents хаштаг ашиглан цахим хөдөлгөөн өрнүүлж байна. 

Та фэйсбүүк грүппт нэгдэхийг хүсвэл Энд дарна уу.