Ган хийц, Уртын Хүр ХХК-иуд хамтран хийн түлш, цахилгаан хосолсон гэрийн зуух, дулаан хадгалагч халаагуур бүтээж, хэрэглээнд нэвтрүүлжээ. Уг зуух, халаагуураа Агаарын бохирдлыг бууруулах Үндэсний хорооны Ажлын албаны дарга С.Даваасүрэн, мэргэжилтэн Г.Намхайдорж нарт танилцуулав.
Хийн түлш, цахилгаан хосолсон зуух, халаагуур нь агаар сэлгэгчтэй, 50 мкв талбайг дулаанаар хангах хүчин чадалтай, газ алдагдлыг мэдэрч, автоматаар хаагддаг хавхлагатай. Мөн температур мэдрэгчтэй учраас тохируулсан хэмд дулаанаа барьж, эрчим хүч хэмнэдэг байна.
Халаагуур нь дулаанаа 6 цаг хадгалж, гэрийн халаалтыг шийдэхээс гадна хийн түлшээр хоол, цай хийж ахуйн хэрэглээг давхар хангах боломжтойг зохион бүтээгч Ш.Алтангэрэл танилцуулав.
Хийн түлш, халаагуур хосолсон зуухыг одоогоор нийслэл болон орон нутгийн 70 гаруй айл тогтмол хэрэглэж байна. Хосолсон хэрэглээтэй зуухыг шинээр хийхээс гадна айлын хэрэглэж буй зуухыг нэмэлтээр тоноглож, цахилгаан, хийн түлшний зориулалттай болгох боломжтой. Одоо хэрэглэж буй зуухаа тоноглуулах нь бага зардлаар нүүрснээс салж, цэвэр хэрэглээнд шилжихийг зохион бүтээгч хэлж байна.
