Засгийн газарт хамтарснаараа гудамжинд байсан намынхнаа албан тушаалд томилж эхэлсэн АН-ынхны томилгоо төрийн зарим байгууллагуудыг самарч эхлээд байна. Олон жил гудамжинд явсан зарим нэг нь өлөн чоно шиг уулгалан дайрч, авч болох албан тушаал, цол, шагнал ер нь юу л байна бүхнийг авч, өөрөө өөрийгөө ч хүртэл шагнаж буй бололтой.
Ганц жишээ л гэхэд төрийн тусгай хүчнийхэнд үйлчилэх үүрэгтэй Төрийн албан хаагчдын нэгдсэн эмнэлгийн даргаар ХЗДХ-ийн сайд О.Алтангэрэлийн тушаалаар өнгөрсөн оны 12 дугаар сард Н.Одонгуа гэх эмэгтэй томилогсон. Тэрбээр томилогдмогцоо хошууч цолтой болж гуравхан сарын дараа дэд хурандаа цол хүртэж цэргийн 2 дээд цолыг зургаахан сарын хугацаанд дараалан аваад байна. Насаараа цэргийн байгууллагад ажиллаад ч дэд хурандаа байтугай хошууч цолыг авахын тулд олон өндөр шалгуур шаардлагыг хангадаг. Гэтэл ийм олон мянган офицеруудад улстөрчийн эр бяраа гайхуулж хүчний байгууллагын түүхэнд үзэгдээгүй жишгийг энэ хүн үзүүлжээ.
Ганц цэргийн цол ч биш төрийн одон “Алтангадас”-аар энгэрээ цоолж, өөрөө өөртөө тушаал гарган эмнэлгийн төсвөөс 500 мянган төгрөгөөр өөрийгөө мялаасан нь Төрийн тусгай албан хаагчдын нэгдсэн эмнэлгээр нэг элэг доог болж байгааг хэвлэлүүд ч мэдээлээд эхэлсэн.Үүнээс үүдэн “Фокус медиа” Төрийн тусгай албан хаагчдын нэгдсэн эмнэлэгт үүссэн ноцтой асуудлуудыг фокуслан хүргэж байна.
САЙДЫН ТОЙРГИЙНХОН, АН-ЫНХНЫ “СУВИЛАЛ”
ЭМД-ын Үндэсний зөвлөлийн тогтоолоор эмнэлэг бүрд хэвтүүлж эмчлэх өвчтөнүүдэд квот тогтоосон. Тогтоосон квотын дагуу даатгалаас санхүүжилт өгч илүү олон хүн хэвтүүлсэн бол тухайн эмнэлэг өөрсдөө зардлаа даах эсвэл алдагдалд ордог журамтай. Гэтэл Н.Одонгуа дарга болсноос хойш энэ эмнэлэг АН-ынхны “сувилал” болжээ. Баянхонгор аймгаас 150, Архангайгаас 100, Өвөрхангайгаас 100 гээд ХЗДХ-ийн сайд О.Алтангэрэлийн тойргийн эрүүл саруул шахуу иргэд сувилалд ирж байгаа юм шиг л бөөн бөөнөөрөө ирж хэвтсэнээс тусгай алба хаагчдын хэвтүүлж эмчлэх квотыг дуусгаж байгаа аж.
Сайдын тойргийнхноос гадна Н.Одонгуа даргын нам нэгт найзууд ч тасрахаа больсон гэнэ.
АН-ын “элийрэгч” Уянга, тэмцэгч Хажидмаа гээд олны танил олон эрхмүүдээс эхлээд зүс таних олон улстөрч ноцтой өвчингүй атлаа хэвтэн эмчлүүлж, олон өдөр шөнө түймэрт явж ирээд мэдрэлийн ядаргаанд орсон, ходоод нь шархалсан тусгай албаны олон хүний эдлэх шаардлагатай байсан боломжийг хулгайлжээ.
Уг нь энэ эмнэлгээр гал усны аюул руу энэ биерээ дайрч ордог онцгойгийнхон, өвлийн хүйтэн, зуны халуунд зам дээр зогсдог цагдаа, улсынхаа дархан хилийг өдөр шөнөгүй нүд цавчилгүй манаж та биднийг амар амгалан аюулгүй байдлыг хангаж байдаг хилчид зэрэг төрийн тусгай хүчнийхэн хэвтэж эмчлүүлж, үйлчилгээ авах ёстой. Гэтэл энэ боломжийг намынхандаа өгч, квотоос нь хулгайлж, эмнэлгээ санхүүгийн хямралд оруулж эхэлсэн Н.Одонгуад хэн хариуцлага тооцох вэ?
Боломж гэдэг нь эмнэлгийн орны тухайд биш юм. Энэ байдлаараа бол наймдугаар сараас эхлэн эмнэлэг санхүүгийн хувьд алдагдалд орч, эмч ажилтнууд нь цалингүй, эм тариагаа ч авах мөнгөгүй болох хэмжээнд хүрч болзошгүй болжээ.
Тиймээс ХЗДХ-ийн сайд О.Алтангэрэл та огцрохоосоо өмнө энэ эмнэлэгт анхаарал хандуулж, Н.Одонгуагаа аваад хамт явна уу?
Төрийн тусгай албан хаагчдын нэгдсэн эмнэлэг бол ХЗДХЯ-нд харьяалагддаг эмнэлэг. Энэ утгаараа сайдын томилгоо энэ эмнэлгийг тойрдоггүй. Гэхдээ Н.Одонгуа гэх олон сонгуульд нэр дэвшиж, очсон албан тушаал бүрдээ хэл ам дагуулж, Сувилахуйн Сургууль, АШУҮИС гээд ажилласан байгууллага бүрдээ асуудал үүсгэдэг түүхтэй хэмээн эрүүл мэндийн салбарынхан нь толгой сэгсрэн гасалцгааж байна.
БҮТЦИЙН ӨӨРЧЛӨЛТ НЭРЭЭР САЙДЫНХАА ДҮҮ, ГЕНСЕКИЙНХЭЭ ЭГЧИЙГ ДАРГААР ШАХЖЭЭ
Хууль тогтоох дээд байгууллага УИХ-ын сонгуульд нэр дэвшиж байсан Н.Одонгуа уг нь хуулийг хамгийн сайн хэрэгжүүлж, биелүүлэх ёс зүйтэй байх ёстой улстөрч. Гэтэл тэрбээр төрийн тусгай чиг үүргийн эмнэлгийн даргаар томилогдсон атлаа Төрийн албаны тухай хуульд заасан сонгон шалгаруулалтгүйгээр бүтцийн өөрчлөлт нэрээр халхавчлан 10 гаруй хүнийг шууд томилжээ. Олон даргын нүүр үзэж, цэргийн тушаалаар үүрэг биелүүлээд сурсан тус эмнэлгийн эмч нар бүгд тусгай тангараг өргөсөн офицерүүд байдаг. Төрийн албаны мерит зарчим, цэргийн цол дэг, ажил мэргэжлийн ур чадвараараа тушаал дэвшин ажилладаг байсан мерит зарчмыг тэр үл тоожээ.
Бүцтийн өөрчлөлтөө хамт олны хуралд ч сонсголгүйгээр тусгай алба хаах нас нь хэтэрсэн, төрийн албаны шаардлага ч хангахгүй хүмүүсийг ямар ч сонгон шалгаруулалтгүйгээр тасаг, албаны даргаар шууд томилжээ. Энэ хууль бус томилгоогоор эмнэлгийн тасаг, албаны даргын 80 хувийг АН-ын хамаарал бүхий хүмүүс, хамаатан саднаар нь өөрчилж байгууллагын хүний нөцийн бодлогыг алдагдуулжээ. Тухайлбал, Гэмтлийн тасгийн эрхлэгчээр ХЗДХ-ийн сайд Л.Алтангэрэлийн эцэг нэгтэй дүү гэх хүнийг, Дүрс оношлогооны тасгийн эрхлэгчээр АН-ын генсек Н.Ганибалын төрсөн эгчийг шууд томилоод байгаад АТГ анхаарал хандуулахгүй өнгөрчээ.
Үүнийг нь хүлээн зөвшөөрөхгүй, үг хэл гаргасан хүмүүсийг “Өргөдлөө бич” хэмээн шахаж, ажлын байрны дарамт үзүүлдэг талаар эмнэлгийнхэн нь чимээгүйхэн шивнэлдэж айдас хүйдэс дунд ажиллаж байна.
ЦАХИМ ПРОГРАММ НЭРТЭЙ МӨНГӨ УГААЛТЫН АРД ХЭН БАЙГАА ВЭ?
Тус эмнэлэг бол олон улсад магадлан итгэмжлэгдсэн Монгол Улсын төрийн ганц эмнэлэг .Ялангуяа цахим хэрэглээгээрээ бусад төрийн эмнэлгүүдэд жишиг үлгэрлэл болж зарим оношлогоондоо хиймэл оюун ухааныг хүртэл нэвтрүүлж эхлээд байсан. Гэтэл энэ эмнэлгийн үйл ажиллагааг өвчтөний түүхийг цаасан дээрээ бичдэг болтол нь ухраажээ. Үүнээс болоод тус эмнэлгээр үйлчлүүлэгчид олон цаг, минутаар хүлээн, дээш доошоо цаас барьж гүйсээр эмч өвчтөнүүдийн аль аль нь бөөн чирэгдэл, бухимдалтай болсныг энэ эмнэлгийн үүдээр нь оронгуут мэдэрнэ. “Арай ч ийм эмнэлэг байгаагүй юмсан. Юу болчихоо вэ?” гэж гайхаж аргаа барсан өвчтөнүүдийн үгийг энэ эмнэлгийн давхар бүрээс сонсч болно. Хамгийн ноцтой нь төрийн тусгай алба хаагчдын эрүүл мэндийн талаарх бүх мэдээлэл байдаг энэ эмнэлгийн нууцлал, аюулгүй байдалд Тагнуулын ерөнхий газар анхаарал хандуулахгүй бол эрдсэлд ороод байна. Учир нь Н.Одонгуа дарга ямар ч бэлтгэл хангахгүйгээр цахим шинэчлэл нэрээр “И клиник” гэх цахим программыг гэнэт нэвтрүүлсэн нь эмчлүүлэгчдийн нууцлалыг байтугай өдөр тутмын үйл ажиллагаагааг нь ч хангаж чадахгүй маш ноцтой асуудлыг үүсгэжээ. Энэхүү программыг хийсэн гэх компани нь 2024 оны УИХ-ын сонгуульд нэр дэвшихэд нь Н.Одонгуа даргад хандив өгсөн, ашиг сонирхлын ноцтой зөрчилтэй, “өр төлөлттэй” холбоотой байж болзошгүй ноцтой баримтууд байна. Баримтыг үргэлжлүүлэн фокуслана.
Сэтгэгдэл (92)