БНСУ-ын Ерөнхийлөгчийн сонгуулийн санал хураалт өнөөдөр өглөө эхэллээ.
Ерөнхийлөгч асан Юн Сок Ёль онц байдал зарласнаас хойш яг зургаан сарын дараа энэ удаагийн санал хураалт явагдаж байгаа. Энэ нь тус улсын хувьд улс төрийн хурц нөхцөл байдал үүссэний дараа явагдаж буйгаараа онцлогтой сонгууль юм.
Ерөнхийлөгчийн төлөө таван нэр дэвшигч өрсөлдөж байна. Ардчилсан намын Ли Жэ Мён, Ардын хүчний Ким Мүн Сү нарын өрсөлдөөн хамгийн ширүүн явагдаж байна.
Тэд эдийн засгийн өсөлт, хиймэл оюун ухааны хөгжлийг амлалт болгож, Үндсэн хуулийн өөрчлөлтийн асуудлаар ч байр суурь нэгтэй байгаа нь олон нийтийн анхаарлыг татаж буй.
Шинэ Ерөнхийлөгч өнөө шөнөдөө багтаж тодрох төлөвтэй байгаа юм.
Улсын хэмжээнд 14,295 санал авах байранд 44 сая гаруй сонгогч саналаа өгч байна. Урьдчилсан санал хураалтад оролцсон иргэдийн тоо 15.4 саяд хүрч, 34.74%-ийн ирцтэйгээр дээд амжилтын тогтоов.
Өнөөдөр 13:00 цагийн байдлаар БНСУ-ын Ерөнхийлөгчийн сонгуулийн ирц 62 хувийг давсан байна. Санал хураалт оройн 20:00 цаг хүртэл үргэлжилнэ.
