Жүдо бөхийн насанд хүрэгчдийн “Их дуулга” тэмцээн Казахстаны Астана хотод өнөөдөр эхэлнэ. Барсигийн “Их дуулга” нэрийн дор болж буй уг тэмцээнд 44 орны 370 жүдоч оролцох юм. Өнөөдөр эрэгтэйчүүдийн -60 кг, 66 кг, эмэгтэйчүүдийн -48 кг, -52 кг, -57 кг-ын жингийн барилдаан болж, медальтнууд тодорно. Манай улсаас өнөөдөр нийт найман жүдоч барилдана. Тухайлбал, -60 кг-д Б.Сүхбат Казахстаны О.Талгат, Б.Энэбиш Болгарын Иван Симоновтой барилдахаар оноолт таарчээ. Энэ жинд нийт 31 жүдоч барилдах юм. Мөн -66 кг-ын жинд "Баку-2018" ДАШТ-ий долоодугаар байрын шагналт Г.Хэрлэн болон Ө.Жанцандорж нар барилдана.
Эмэгтэйчүүдийн -48 кг-ын жинд Г.Наранцэцэг “D” хэсгийг тэргүүлсэн. Манай тамирчин эхний тойрогтоо хийлсэн. Г.Наранцэцэг Франц, Казахстаны жүдочдын аль ялсантай нь хоёрдугаар тойрогт барилдана. Энэ жинд нийт 24 жүдоч барилдахаар болжээ.
Харин -52 кг-ын жинд Б.Уранзаяа, М.Нандин-Эрдэнэ, -57 кг-д өсвөрийн дэлхийн аварга Т.Ариунзаяа нар барилдана.
