Монгол Улсын Ерөнхийлөгч, Зэвсэгт хүчний Ерөнхий командлагч Ухнаагийн Хүрэлсүхийн санаачлагаар 2021-2024 онуудад зохион байгуулагдсан Хөвсгөл нуурын эко системийг хамгаалах, нуурын ёроолын аюултай хог хаягдлыг цэвэрлэх, бохирдлыг бууруулах живсэн тээврийн хэрэгслийг эрэн хайх, илрүүлэх ажиллагааг хийсэн билээ.
Уг ажлын хүрээнд Хөвсгөл нуурын 33-171 метрийн гүнээс 11 автомашин, техникийг татан гаргаж, 50 орчим тн бохирдол шатахуун, тос тосолгооны материал, аюултай хог хаягдлыг аюулгүй болгож, Хөвсгөл нуурыг бохирдох эрсдэлээс хамгаалж чадсан юм.
Тэгвэл УИХ-ын гишүүн Б.Найдалаа цахим хуудсандаа дараах мэдээллийг нийтэлжээ. Тэрээр "Хөвсгөл нуурт живсэн усан онгоц, машин тэргүүдийн заримыг нь буцаагаад усанд нь байрлуулвал яасан юм? Энэ санааг аялал жуулчлалын мэргэжилтнүүд, усанд шумбагчид хэлсэн юм.
Уснаас гаргаад тавьсан нь зүгээр л төмрийн хог болно, харин байгаль орчин, нуурын усанд хортой байж болох түлш, тос, эд зүйлээс нь цэвэрлэж, хоргүй болгоод буцааж тавьбал Хөвсгөл далайн аялал жуулчлал, гүний шумбалтын сонирхолтой нэг бүтээгдэхүүн болчихно. Яагаад, хэзээ хэрхэн живсэн үүх түүхийг нь тодруулж бичээд, шумбуулж үзүүлээд байвал сонирхолтой.
Үнэндээ Хөвсгөл нуурын гүнд шумбалт хийлээ гэхэд тэнд тас харанхуй, хүнд үзүүлж сонирхуулчихаар юм байхгүй гэнэ лээ. Жуулчид гүний шумбалт хийдэг нь нэг бол загас, шүрэн арал, ургамал ч юм уу далайн гүний гоё сайхныг үзэх, эсвэл Титаник маягийн живсэн түүх домогтой "хог новш"-ийг үзэх болохоос тас харанхуй ёроол сонин биш.
Бас эдгээр живсэн усан онгоц, машин техник нуурын ёроолын амьтан, загас, ургамалд бас ургах, өсч үржих үүр оромж нь болдог сайн талтай гэсэн шүү." гэжээ.
