УИХ-ын чуулганы өнөөдрийн хуралдаанаар өнгөрсөн жил буюу 2024 онд батлагдан хэрэгжиж буй Импортын гурилыг гаалийн албан татвараас чөлөөлөх тухай хуулийг хүчингүй болгох хуулийн төслийг хэлэлцэж буй нь гишүүдийн дунд багагүй маргаан дэгдээгээд байна. Монголын төр баталсан хуулиа салбарын сайд солигдох бүрд өөрчлөөд байх нь буруу гэсэн байр суурийг гишүүдийн олонхи нь хэлж байсан. Сүүлийн хэдэн жил Монголын төрөөс үндэсний үйлдвэрлэлийг дэмжих бодлогоор тариаланч, үйлдвэрлэгчдэд татаас өгөх, бага хүүтэй зээл өгөх зэргээр дэмжиж ирсэн. Гэвч гурилын үнэ жил бүр шахуу нэмэгдсээр ард түмэн гурил авч дийлэхээ болих хэмжээнд хүрсэн. Үүнээс үүдэн 2020-2024 оны Парламентаар Импортын гурилын үнийг татвараас чөлөөлөх хуулийг санаачлан баталсан билээ. Үр дүнд нь Оросоос чанарын хувьд илүү юу гэхээс дутахааргүй хямд үнэтэй гурил орж ирж буй. Харамсалтай нь Хүнс хөдөө аж ахуй хөнгөн үйлдвэрийн сайдаар ашиг сонирхлын зөрчилтэй Ж.Энхбаяр томилогдсоноор үндэсний үйлдвэрлэлийг дэмжих нэрээр, гурилын үйлдвэрүүдийн эрх ашгийг илт хамгаалсан энэхүү хуулийн төслийг батлуулахаар улайрч эхэлжээ.
Тэрбээр энэхүү хуулийн төсөлтэйгөө холбогдуулан хэвлэлд өгсөн ярилцлагууддаа "Импортын гурилын татварыг тэглэснээр дотоодын үйлдвэрлэлийнхээ 40 хувийг алдсан. Одоогоор 2 үйлдвэр үйлдвэрлэлээ зогсоож, 5 үйлдвэр 15-20 хувийн хүчин чадлаараа ажиллаж байна" хэмээн мэдээлжээ.
Харин УИХ-ын даргын хэлснээр "Гурилын үйлдвэрлэл багассан нь татвар тэглэсэнтэй холбоогүй. Хууль батлагдахаас өмнө 2023 онд гурилын үйлдвэрүүд хүчин чадлынхаа 33 хувиар ажиллаж байсан бол хууль хэрэгжсэнээс хойш буюу 2024 онд 25 хувийн хүчин чадалтайгаар ажилласан" гэсэн мэдээллийг өгсөн.
Чуулганы хуралдаанаар ХХААХҮЯ зээл хүссэн малчид, тариаланчдыг аймаг орон нутгаар нь ялгаварлан хандаж буй талаар баруун бүсээс сонгогдсон УИХ-ын дарга Д.Амарбаясгалан, УИХ-ын гишүүн Б.Пүрэвдорж нарын гишүүд Ж.Энхбаяр сайдаас тайлбар нэхсэн. Мөн УИХ-ын гишүүн Б.Баярбаатар "Ж.Энхбаяр сайд та, монопол болчихсон гурилын үйлдвэрүүдийн хэвлэлийн төлөөлөгч шиг битгий ажилла. ХХААХҮЯ нь төвийн бүсийн бодлогын яам биш" хэмээн ХХААХҮЯ-ны сайд Ж.Энхбаярт хатуухан үг шидсэн .
