БИТҮҮЛЭХ ЁС
Битүүний өдөр гэдэг нь тухайн жилийн сүүлийн өдөр. Дуусаж буй жилийг дугуйлан үдэж, шинэ жилийг угтан авах бэлтгэл хийх өдөр.
Битүүний өглөө эртлэн босож, гэрийнхээ тоос шороог арчиж цэвэрлэнэ. Шинийн 4 хүртэл усанд явахыг цээрлэх тул ус, түлээгээ базааж бэлтгэнэ. Битүүлгийн шүүсээ чанана. Амны билгээс ашдыг билэгдэх тул үг хэл, явдлаа цэгцлэн, үргэлж сайн сайхан зүйл ярьж, энх төвшин байна. Битүүний орой нар жаргахтай уралдан идээ ундаа, бурхан тахилаа засаж, цагаалга, битүүлгийн идээ шүүсээ дэлгэн, харуй бүрий болж, тэнгэрт эхний од гарч эхлэхэд шинэ, цэвэрхэн битүү хувцас, малгайгаа өмсөж гэртээ битүүлнэ. Цай, хоол, идээ, будааны дээжийг бурхан тахилдаа өргөн өтгөс бууралдаа олбог дэвсэн хүндэтгэн залж, гэрийн эзэн, бүх гишүүд цайлж дараа нь цагаалгаа амсаж байж цагаалга болдог. Битүүлгийн хоол нь нутаг усныхны онцлогоос хамаарч банш, бууз, хуушуур байна. Битүүлэхдээ ирэх жилд ажил үйлсэд саад тотгор үгүй дэвжин дээшлэхийг билэгдэж гэрийнхээ зүүн хатавчиндаа харгана, үүдний тотго дээрээ Лхам бурхны хүлгийн ундаа болгож хөлдөөсөн мөс, будаа тавьдаг заншилтай.
