Энэ онд Цагаан сарын шинийн хоёрон аргын тооллын гуравдугаар сарын 1-ний өдөр тохионо. Гуравдугаар сарын 1-3-ны өдрүүдэд амарна. Гуравдугаар сарын 1, 2-ны өдрүүд нь амралтын өдөр таарсан тул зарим хүн хөдөө явж золгодог зэргийг харгалзан Цагаан сарын амралтын өдрийг сунгах хүсэлтэй байгаа юм.
Иймд УИХ-ын гишүүн, Гэр бүл, хөдөлмөр, нийгмийн хамгааллын сайд Л.Энх-Амгалан Сар шинийн баяраар бүх нийтээрээ арван хоног амардаг байх төсөл боловсруулж буйгаа өмнө нь мэдээлсэн. Тэрбээр өнөөдрийн Засгийн газрын хуралдаанд наадам, цагаан сарын амралтын талаар танилцуулга хийжээ.
Энэ талаар Гэр бүл, хөдөлмөр, нийгмийн хамгааллын сайд Л.Энх-Амгалан "Монголчууд бид 9 баяраар 16 өдөр амардаг зохицуулалттай. Шинийн 1,2,3-нд амардаг, Үндэсний их баяр наадмаар 7 сарын 10-15-ны өдрүүдэд амардаг зохицуулалттай.
Иргэдээс их олон санал гарч байгаа учраас шинийн 1,2,3 болон наадмын хуулиар амрах өдөр бямба, нямд таарсан тохиолдолд энэ өдрүүдийг нөхөж амраадаг болгох зохицуулалтыг хийх Засгийн газраас чиглэл өглөө.
Мөн өвлийн эд хүйтэнд ард, иргэдээ зайнаас ажиллуулдаг болгох, үүнийг хүүхдийн өвлийн амралттай уялдуулах зэрэг шинэ зохицуулалтыг нэмж танилцуулах үүрэг өглөө. Засгийн газрын тогтоол гараагүй. Зөвхөн үүрэг, чиглэл л өгсөн. Тэгэхээр энэ жилийн цаган сараар 5 хоног амрах юм байна гэж бодоод яваад өгч болохгүй шүү. Үүнд, Хөдөлмөрийн болон Нийтээр тэмдэглэх баярын болон тэмдэглэлт өдрүүдийн тухай хоёр хуульд өөрчлөлт орох учраас Засгийн газраас зөвшөөрөл өгвөл УИХ-д өргөн бариад УИХ баталсны дараа энэ зохицуулалт эхэлнэ гэсэн үг.
УИХ хаврын чуулганаар үүнийг баталбал наадам болон сар шинийн баяраар энэ зохицуулалт хэрэгжиж эхэлнэ. Тэгвэл цагаан сар бямба, нямд таарвал 4-6 хоног, наадмын өдрүүдэд таарвал 8 хоног амрах зохицуулалттай болно гэсэн үг.
Бусад улсад ч баярын өдрүүдээрээ урт амралтын зохицуулалт хийдэг юм билээ” гэв.
