Монголын мэргэжлийн боксын зөвлөл, Tsendy Heroes компани, тэмцээн зохион байгуулагчид болон Гавьяат тамирчин Э.Цэндбаатар хэрхэн бэлтгэл хангаж буй талаараа мэдээлэл хийлээ.
Энэ үеэр МУГТ Э.Цэндбаатар хэлэхдээ "Бокс тоглоод 16 жил болж байна. Мэргэжлийн боксын дэвжээнд хөл тавиад хоёр жил боллоо. Би өөрийн гэсэн багтай болсон. Багт маань залуу үеийн төлөөлөл болсон хүчтэй найзууд маань бий. Залуучуудыг ялангуяа дүү нарыгаа мэргэжлийн бокс руу гаргая гэж бодож байна.
Хойд Америкийн аваргын бүсийг авах гэж хоёр жил хөдөлмөрлөж, хичээлээ. Харин одоо бүсээ хамгаалах гэж байна.
Би 61.2 буюу дээд жиндээ тоглохоор болсон. Миний өрсөлдөгчөөр 2-3 тамирчин бий. Тэд 20-оос дээш тоглолттой атлаа нэг хожигдолтой буюу бараг хожигдолгүй тамирчид.
Дэлхийн чансааны ТОП 15-д буй тамирчид юм. WBA холбооны ерөнхийлөгч ирнэ. Миний промотер, менежерүүд, багийнхан маань энэ тэмцээнийг Монголд зохион байгуулах гэж маш их хөдөлмөрлөж байна. Тэр хэрээр их хэмжээний хөрөнгө оруулалтыг ч босгож байгаа юм.
Майк Тайсон гэх тамирчныг та бүгд мэднэ. Үүн шиг л зурагтаар үздэг тоглолтыг Монголд харуулахыг зорьж байна.
Энэ бүсийг авах гэж би маш их хичээсэн. Би зүгээр л маш их хичээдэг. Өдөр бүр 10кг хасаж байна. Багийнхандаа, Монголчууддаа ялалтыг авчирмаар байна.
Би "Баянгол"-д байрлаад бэлтгэлээ хангаж байна. Багш маань 14 хоногийн хугацаагаар ирээд нутаг буцсан. Тэмцээн болохоос долоо хоногийн өмнө ирнэ.
Монголын нөхцөл бэлтгэл хийхэд маш хүнд байна. Түгжрэл, утаа, өглөө гүйхэд тулгарах бэрхшээл гээд баахан асуудал байна. Тиймээс энэ тулаанаа хийхийн тулд энэ сарын 15-нд буцаад Америк явна. Тэмцээний өмнө буюу хоёрдугаар сарын 10-нд буцаж ирээд тулаанаа хийнэ гэсэн төлөвлөгөөтэй байна.
Хэрэв энэ тулаанд ялалт байгуулбал, тавдугаар сард дэлхийн аваргад тулалдах боломж нээгдэнэ. Тиймээс би хожигдолгүй байх ёстой.
Ирээдүй болсон дүү нартаа зөв үлгэр дуурайл байхыг хүсэж байна.
Онцолж хэлэхэд энэ тэмцээнд Н.Төгсцогт ахыг тоглооч гэж хүссэн. Миний аваргын бүс авах тулааны өмнө Н.Төгсцогт ах тулалдана гэдгийг дуулгаж байгаадаа баяртай байна.
Хичээвэл хүрч болохгүй амжилт гэж үгүй гэдгийг залуус, дүү нартаа хүргэхээр л зорьж байна" гэлээ.
Цаашид манай компани монгол тамирчдыг дэлхийн дэвжээнд гаргах зорилгоор ажиллах болно. Дэлхийн олон промотер, боксын салбарынхан Монголыг баг тамирчдыг маш их сонирхож байна . Гаднын тамирчдын хувьд Э.Цэндбаатарыг л ялчихвал чансаа маш хурдан өснө гэж харж буй хэмээн зохион байгуулагчид хэллээ.
