Улаанбаатар хотын авто замын түгжрэлийг бууруулах зорилтын хүрээнд Тусгай замын автобус BRT төслийг Азийн хөгжлийн банкны зээлийн санхүүжилтээр хэрэгжүүлэхээр төлөвлөсөн. Тус төсөл нь хоёр үе шаттайгаар хэрэгжих бөгөөд нэгдүгээр хэсгийн ТЭЗҮ-ийг боловсруулж, судалгааны ажлуудыг хийж байна.
Төслийн хүрээнд Азийн хөгжлийн банк, Зөвлөх үйлчилгээ үзүүлж буй “Far east Mobility” компани болон “Нийслэл Улаанбаатар хотын авто замын түгжрэлийг бууруулах НТХН”-ийн хамтарсан ажлын хэсэг Ерөнхий трасс зургийн дагуу чиглэлийг тойрч нэмэлт судалгаа хийснээс гадна “Зорчигч тээвэр II” ОНӨААТҮГ-т /2024.12.12/ ажиллалаа.
Азийн хөгжлийн банкны Байгаль орчны асуудал хариуцсан ахлах мэргэжилтэн Шотари Сасаки “Манай банк нь хөгжлийг тэтгэсэн төсөл хөтөлбөр, тэр дундаа иргэдийн төлөө чиглэсэн ажлуудыг дэмждэг. Бүтээн байгуулалт хэдий чухал ч, төслөөс үүдэн гарах сөрөг нөлөөлөлд бид анхаарал хандуулах ёстой. Газар чөлөөлөлтөөс шалтгаалж тухайн нутгийн хүмүүс хохирох, барилгын үйл ажиллагаанаас үүдэж байгаль орчинд сөрөг нөлөөлөл учрах ёсгүй. Бид эдгээр зүйлсийг тоохгүй өнгөрөөвөл төсөл амжилтанд хүрэхгүй. Тиймээс байгаль орчны нөлөөлөл талаас нь бид анхаарал хандуулж байна” гэв.
“Far East Mobility” компанийн ахлах Дуан Шаомэй хэлэхдээ “Улаанбаатар хотод BRT төслийг хэрэгжүүлэх боломжтой гэж хардаг. Тухайлбал, Гуанжоу хотыг Улаанбаатартай харьцуулбал хоёр дахин их түгжрэлтэй байсан ч, тусгай замын автобусны үйлчилгээг нэвтрүүлснээр ачаалал эрс буурсан. Төслийг хэрэгжүүлэхэд шугам хоолой, машины зогсоол, явган хүний зам зэргийг нүүлгэх асуудал тулгарна” гэв.
Тусгай замын автобусны төсөл хэрэгжсэнээр өдөрт 25000-35000 зорчигч тээвэрлэх боломжтой болж, автобусны дундаж хурд 20-25км/ц болж нэмэгдэнэ хэмээн тооцож байгаа аж. Тус төслийн ТЭЗҮ-ийг боловсруулж байна.
Төслийн I хэсгийн явц: ТЭЗҮ, Зураг төслийг боловсруулж байна
Урт: 12 км, 17 зогсоолтой
Хэрэгжих хугацаа: 2024-2027 он
