Б.Энх-Амгалангийн УИХ-ын гишүүний бүрэн эрхийг яаралтай түтгэлзүүлнэ

2019 оноос хойш өнөөдрийг хүртэл тавьж дуусдаггүй Дарханы замын асуудалтай холбогдуулан Зам тээврийн сайд асан,  УИХ-ын гишүүн Б.Энх-Амгалан болон ЗТХЯ-ны  удирдлагуудыг АТГ шалгаж буй.

Үүнтэй холбогдуулан ирэх 7 хоногт эхлэх УИХ-ын ээлжит бус чуулганаар Б.Энх-Амгалангийн УИХ-ын гишүүний бүрэн эрхийг түтгэлзүүлэх асуудлыг УЕП-оос оруулж ирэх  талаар улс төрийн хүрээнийхэн дунд яригдаж байна.

Үндсэн хуулийн нэмэлт өөрчлөлттэй холбогдуулан Л.Оюун-Эрдэнийн Засгийн газар дундаасаа солигдох нь тодорхой байгаа. Магадгүй Ерөнхий сайдад ч хариуцлага тооцох талаар ярьж буй. Ийм үед энэ Засгийн газрын шүдний өвчин болсон Дарханы замын асуудлаар экс сайд Б.Энх-Амгаланд хариуцлага тооцон АТГ-аар яаралтай “намнуулах” нь Ерөнхий сайд болон энэ Засгийн газрын нэр хүндэд нэмэртэй. Тиймээс Б.Энх-Амгаланд яаралтай хариуцлага тооцох улс төрийн шаардлага хэрэгцээ байгаа тул УИХ-ын намрын чуулганыг хүлээхгүй байх талтай юм.

Анх 2018 онд Засгийн газар тогтоол гарган Улаанбаатар- дархан-Уул чиглэлийн замыг 4 эгнээ болгон өргөтгөх шийдвэр гаргасан. Энэ дагуу ЗТХЯ-аас тендер зарлан БНХАУ-ын “Хэйлонжин Жиньей Рөүд энд Бридж”, “Гуйжоу Хайвэй Инженеринг групп”, “Чайна Стэйт Шинжиан инженеринг”, “Чайна Жео-Инженеринг корпораци” гэсэн дөрвөн компаниг сонгон шалгаруусан байдаг. Гэвч энэ зам 2019 оны гуравдугаар сараас өнөөдрийг хүртэл 3 жил 5 сар баригдаж дуусалгүй тамын зам болсон. Тиймээс ЗТХЯ-ны удирдлагууд шаардлага хангаагүй энэ компаниудыг эрх мэдлээ урвуулан ашиглаж , шалгаруулсан байх магадлалтай хэмээн үзэж байна.  Тиймээс тухайн үеийн удирдлага болох  Зам тээврийн сайд Б.Энх-Амгалан, ТНБД С.Батболд болон яамны газрын дарга Х.Оргил-Эрдэнэ нарын хүмүүсийг шалгаж байна.

Тухайн үед Дарханы замын тендерийн сонгон шалгаруулалтын үнэлгээний хороог ТНБД С.Батболдын тушаалаар 2019 оны 02.15 өдөр байгуулсан бол  тендерийн үнэлгээний хороог БНХАУ-ын компаниас хахууль авч байгаад газар дээрээ баригдсан ЗТХЯ-ны газрын дарга Х.Оргил-Эрдэнэ ахалжээ.

Энэ асуудлыг АТГ яаравчилсан шуурхай байдлаар шалагж буй мэдээлэл байна. Тэд өнөөдөр ЗТХЯ-нд нэгжлэг хийж бичиг баримт хураасан мэдээлэл бий. Тиймээс  УЕП-оос АТГ-ын мөрдөн шалгах ажиллагаатай холбогдуулан бүрэн эрхийг түтгэлзүүлэх саналыг хэдхэн хоногийн дараа эхлэх УИХ-ын намрын чуулганаар өргөн барих магадлалтай байна.