Стандартчилал, техникийн зохицуулалт, тохирлын үнэлгээний итгэмжлэлийн тухай хуулийг шинэчилсэн найруулж буйтай холбоотойгоор УИХ-ын даргын 84 дүгээр тогтоолоор байгуулагдсан Стандартын эрх зүйн орчныг шинэчлэх санал, дүгнэлт гаргах, холбогдох хууль тогтоомжийн төсөл боловсруулах үүрэг бүхий ажлын хэсгийн гишүүдийн анхдугаар хуралдаан боллоо.
Анх 1994 онд Стандартчилал, чанарын баталгаажуулалтын тухай хууль батлагдаж, 2003 онд Стандартчилал, тохирлын үнэлгээний хууль болгон өөрчилж, дараа нь 2017 онд Стандартчилал, тохирлын үнэлгээний итгэмжлэлийн тухай хууль болгон шинэчилснээс хойш өдийг хүртэл тус хуульд өөрчлөлт ороогүй.
Шадар сайд С.Амарсайхан хэлсэн үгэндээ: “Стандарт бол эрүүл, аюулгүй орчинд амьдрах суурь нөхцөлийг бүрдүүлдэг гол хүчин зүйл. Монгол Улсын иргэд эрүүл, аюулгүй орчинд амьдрах Үндсэн хуулиар олгогдсон эрхтэй. Үндсэн хуулийн энэхүү заалттай уялдуулж Монгол Улсын Засгийн газрын 2020-2024 онд хэрэгжүүлэх үйл ажиллагааны хөтөлбөрт “Нэг улс-Нэгдсэн стандарт” зорилт туссан. Түүнчлэн “Алсын хараа-2050” Монгол Улсын урт хугацааны хөгжлийн бодлого болоод Шинэ сэргэлтийн бодлого, Хүнсний хангамж, аюулгүй байдлыг хангах талаар авах зарим арга хэмжээний тухай зэрэг бодлогын олон баримт бичигт стандартчилал, тохирлын үнэлгээний талаар тусгагдсан байдгийг чухалчилсан".
Стандартчилал, техникийн зохицуулалт, тохирлын үнэлгээний итгэмжлэлийн тухай хууль шинэчлэн найруулга нь 7 бүлэг 34 зүйлтэй.
Хуулийн шинэчилсэн найруулгад:
Салбар дундын уялдаа холбоог сайжруулж, стандартыг иргэн, хуулийн этгээд дагаж мөрдөхөөс гадна төрийн хяналт шалгалтыг илүү тодорхой болгосон. Хуулийн нэр томьёоны тодорхойлолтыг ойлгомжтой, Монгол Улсын нутаг дэвсгэрт тохирлын үнэлгээний үйл ажиллагаа эрхлэх хуулийн этгээд бүр бүртгүүлнэ. Тохирлын үнэлгээний байгууллагын эрх үүргийг тодорхой болгож, мэдээллийн нэгдсэн санг бий болгохоос гадна Засгийн газрын гишүүн, төрийн захиргааны төв байгууллага, Нийслэл Улаанбаатар хотын Засаг даргын бүрэн эрхийг тодорхой тусгасан.
