УИХ-ын дарга Д.Амарбаясгалан: Парламентад суудалтай болон суудалгүй намуудын зөвшилцөл, ойлголцлын дүнд Монгол Улсын Үндсэн хуулинд 2023 онд томоохон өөрчлөлт хийж чадсан. 2024 оны ээлжит сонгуулиар нам, эвслээс нэр дэвшүүлэхдээ нийт нэр дэвшигчийн 30 хувь нь эмэгтэйчүүд байна гэж заасан. Энэ парламентын сонгуулийн хувь хэмжээг орон нутгийн сонгуулийн түвшинд аваачих шаардлага гарч ирж буй нь энэ ямар том амжилт болсныг илэрхийлж байна.
Өнөөдөр бодит үр дүн гарч, улс төрийн намуудын хандлага их өөрчлөгдөж байна. Улстөрийн намын тухай хуулинд маш том шинэчлэл хийж чадсан. Энэ бол ирэх оны 1-р сарын 1-нээс хэрэгжиж эхлэх Улстөрийн намын тухай хуулиар намын шийдвэр гаргах түвшин дэх төлөөллийн байгууллагад эмэгтэйчүүдийн оролцоог 40 хувь байхаар хуульчилж чадсан.
Энэ бол бидний тавьж буй цаашдын зорилго биелэх том суурь нь тавигдаж байна гэж үзэж байгаа. Цаашлаад ярьвал орон нутгийн түвшин дэх эмэгтэйчүүдийн оролцоог бүрэн хангах чиглэлээр бид ажиллах ёстой.
