НҮБ-ын Ерөнхий ассамблейн шийдвэрээр 1989 оноос эхлэн жил бүрийн 10 дугаар сарын 13-ныг “Гамшгийн эрсдэлийг бууруулах олон улсын өдөр” болгон тэмдэглэж ирсэн уламжлалтай.
Энэ жилийн хувьд “Empowering the next generation for a resilient future” буюу "Гамшгийг даван туулах чадавхтай ирээдүйн төлөө хойч үеэ чадавхжуулах нь" уриан дор тэмдэглэн өнгөрүүлж байна.
Гамшгийн эрсдэлийг бууруулах олон улсын өдрийг тохиолдуулан Монголын улаан загалмай нийгэмлэгээс Онцгой байдлын ерөнхий газартай хамтран "Шинэ Монгол Харүмафүжи" ерөнхий боловсролын сургуулийн 10-12 дугаар ангийн сурагчдад гамшгаас урьдчилан сэргийлэх мэдлэгийг дээшлүүлэх, болзошгүй аюул, гамшгийн үед өөрийгөө болон бусдыг авран хамгаалах дадал, чадварыг эзэмшүүлж, чадавхижуулахад зориулсан өдөрлөгийг зохион байгууллаа.
Өдөрлөгийн үеэр гамшгийн аюулын тухай ерөнхий ойлголт хичээл, мэдлэг сорих асуулт, хариултын тэмцээн, Анхны тусламж, Галын аюулгүй байдал, гамшгийн VR, газар хөдлөлт, гал түймрийн төхөөрөмж, Монголын улаан загалмай нийгэмлэгийн танилцуулга гэсэн өртөөчилсөн аяллыг зохион байгуулав.
Сүүлийн жилүүдэд уур амьсгалын өөрчлөлтөөс үүдэлтэй гамшиг, осол улам бүр нэмэгдэж байгаа нь хүүхэд залуучуудын ахуй, амьдралын чанарт сөргөөр нөлөөлсөөр байна.
НҮБ-ын Хүүхдийн сангийн мэдээлснээр дэлхий даяар 1 тэрбум орчим хүүхэд цаг уурын нөлөөлөл, тэр дундаа уур амьсгалын өөрчлөлттэй холбоотой гамшигт өртөх өндөр эрсдэлтэй байгаа юм.
Тиймээс энэ жил дэлхий нийтээр "Гамшгийг даван туулах чадавхтай ирээдүйн төлөө хойч үеэ чадавхжуулах нь" уриан дор нэгдэж, хүүхэд, залуучуудын гамшгаас урьдчилан сэргийлэх мэдлэг, боловсролыг дээшлүүлэх, гамшгийн эрсдэлийг даван туулах чадавхитай ирээдүйн төлөө хойч үеэ чадавхижуулахад чиглэсэн арга хэмжээ, үйл ажиллагаа зохион байгуулахад анхаарч ажиллах юм
