Засгийн газар Уул уурхайн сайд Г.Ёндонг "Эрдэнэт" үйлдвэрийн ерөнхий захирлаар томилоод хоёр жил болж буй. Томилогдсоноосоо хойш жил бүрийн есдүгээр сарын өдийд ноцтой асуудлууд үүсгэж Засгийн газрын шүдний өвчин болоод буй Г.Ёндонтой холбоотой баримтуудыг фокуслав.
БАРИМТ:
2022.08.31 Засгийн газрын хуралдаанаар Уул уурхай хүнд үйлдвэрийн сайд асан Г.Ёндон Эрдэнэт үйлдвэрийн даргаар томилов
2023. 09.15 Энэ өдөр тус үйлдвэрийн ажилчид ажил хаялт зарлаж буйгаа албан ёсоор мэдэгдэв. Цалинг 50 хувиар нэмэхийг шаардлаа. Үүнтэй холбогдуулан Эрдэнэт үйлдвэрийн Ерөнхий захирал Г.Ёндон "Ажил хаялтад оролцсон ажилчдыг шүүхэд өгөхөө мэдэгдэж шүүхээр хууль бус гэдэг нь тогтоогдсон тохиолдолд бол тодорхой хэмжээний сөрөг нөхцөл байдлууд үүсэх магадлалтай учраас ажил олгогчийн хувьд ажилчдаа анхааруулъя" хэмээн мэдэгдэж чимээгүй болгов.
2024.09.11 Эрдэнэт үйлдвэрийн Ус хангамжийн цех, цэвэрлэх байгууламжийн хэсгийн хлораторын станцад дэлбэрэлт болж 17 настай дадлагажигч болон 37 настай эмэгтэй А хүнд бэртэж эмнэлэгт хүргэгджээ.
ФОКУСЛАВАЛ: Ослыг баллон дэлбэрч, хөдөлмөрийн аюулгүй байдал алдагдсан хэмээн урьдчилсан байдлаар үзэж байгаа юм байна. Гэхдээ "халуун гал" эргэлдэж байдаг Эрдэнэт үйлдвэрийн хувьд хөдөлмөрийн аюулгүй байдал гэдэг №1 асуудал юм. Үүнтэй холбогдуулан Г.Ёндонд хариуцлага тооцон огцруулах асуудал яригдаж байна.
БАРИМТ: Нэгэн цагт Монгол Улсын Ерөнхийлөгч асан Ц.Элбэгдорж Эрдэнэт үйлдвэрийг "сүү" нь дууссан нядалгаанд орох цаг нь болсон "үнээ" хэмээн хэлж байгаад хувьчилсан. Гэвч улс төрийн бүлэглэлүүд энэ үйлдвэрийн Ерөнхий захирлаар өөрийн хүнээ томилох гэсэн амбиц, лобби хүчтэй өрнөсөөр байгаа нь Эрдэнэт одоо ч "саалийн үнээ" хэвээр байгааг баталж буй.
ФОКУСЛАВАЛ:
60 жилийн түүхэнд гарч байгаагүй хөдөлмөрийн аюулгүй байдлаас үүдэлтэй дэлбэрэлт болсон нь Г.Ёндонтой хариуцлага тоцох нэг шалтаг болж байна. Нөгөөтэйгүүр дараагийн ээлжийнхэн Эрдэнэтэд үйлдвэрийг авахын тулд улс төрийн бойкот хийхдээ тулаад байгаа тул асуудал хурцдахаас өмнө Г.Ёндонд хариуцлага тооцдоггүй юм аа гэхэд чимээгүйхэн явуулахаар улс төрийн түвшинд тохиролцжээ.
Түүний оронд, Төрийн өмчийн бодлого зохицуулалтын газрын даргааар буг болтлоо ажиллаж буй Б.Цэнгэл /хуучнаар ТӨХ-ны дарга/ яригдаж байна. Түүнийг суудлаас нь ховхлохын тулд Эрдэнэт үйлдвэрийн Ерөнхий захирлаар явж болох юм гэсэн хүсэлтийг нь харгалзаж буй гэнэ. Мөн УБТЗ-ийн дарга Х.Хэрлэнг Ерөнхийлөгчийн зүгээс зүтгүүлж байгаа гэсэн мэдээлэл байна. Аль аль нь Ерөнхийлөгч У.Хүрэлсүхтэй ойр тул Ерөнхий сайд Л.Оюун-Эрдэнэ хэнийг нь таалж, тохиролцохоос Эрдэнэт үйлдвэрийн дараачийн шинэ Ерөнхий захирал тун удахгүй тодрох нь тодорхой болоод байна.
