Өнөөдөр дэлхийн хүмүүнлэгийн өдөр тохиож байна. Дэлхий даяар 1948 оноос эхлэн тавдугаар сарын 8-ны өдрийг Олон улсын Улаан загалмай, Улаан хавирган сар хөдөлгөөний өдөр болгон тэмдэглэж, хүмүүнлэгийн үзэл санааг түгээн дэлгэрүүлэх, сурталчлах, Улаан загалмайн ажилчид, сайн дурынхан, гишүүд дэмжигчдэд талархал илэрхийлэх өдөр болгон зохион байгуулж иржээ.
Монгол улсын "Үндэсний хүмүүнлэгийн байгууллага" гэх статустай цорын ганц байгууллага болох МУЗН өдгөө 86 жил болж байна.
Монгол Улс 2011 оноос жил бүрийн тавдугаар сарын 8-ны өдрийг "Монголын Хүмүүнлэгийн өдөр" болгох шийдвэр гаргаж, үүнээс хойш Монголын Улаан загалмай нийгэмлэг олон нийт, хүүхэд залуучуудад хүмүүнлэг үйлсийг сурталчлах кампанит ажлыг жил бүр зохион байгуулж ирсэн.
Энэ жил тус өдрийг “Энэрэнгүй үйлсийн талд” уриан дор тэмдэглэж, орон даяар Улаан загалмайн хороодоор дамжуулан олон нийт, хүүхэд залуусын дунд хүмүүнлэгийн үйлсийг сурталчлан ажиллана.
2023-2025 онд МУЗН Монгол улсын өнцөг булан бүрт 13150 өрх айлд хүрч ажиллажээ
Хүмүүнлэгийн ажил гэдэг бол хүнлэг сэтгэлээр хэн нэгэнд тусламж үзүүлэх юм. Тэдний ажил бусдыг энэрэн хайрлах сэтгэлээс урган гардаг. Ийм л ариун нандин сэтгэлээр ажилладаг бүх хүмүүнлэгийн ажилтнууддаа Дэлхийн хүмүүнлэгийн өдрийн мэнд хүргэе.
