Тайланд руу аялсан тохиолдолд гурав хоногийн өмнөөс хилийн хуудас бөглөх болсныг Монгол Улсаас Тайландын Хаант Улсад суугаа ЭСЯ-наас өнөөдөр мэдээллээ. Тухайлбал, Тайланд улс “Ухаалаг аялал жуулчлалын бүс” санаачилгын хүрээнд хилийн хяналт шалгалтыг сайжруулах, боомтын ажиллагааг чирэгдэлгүй болгох, хилийн алба хаагчдын ажлын ачааллыг бууруулах зорилгоор энэ оны тавдугаар сарын нэгнээс хилээр нэвтрэх цахим хуудсыг үйл ажиллагаандаа нэвтрүүлж буй.
Тус цахим хуудас өмнө нь ашиглаж байсан цаасан суурьт “ТМ.6” маягтыг орлох аж. Иймд тус улсад зорчих гадаад улсын иргэд тайланд улсад зорчихоос гурван өдрийн өмнө https://tdac.immigration.go.th цахим холбоос эсвэл тогтсон “QR” кодоор нэвтэрч, хувийн болон аяллын талаарх шаардлагатай мэдээллийг бөглөж, баталгаажуулсны үндсэн дээр хил нэвтрэх юм. Хэрэв хил давахаас гурав хоногийн өмнө зорчих хуудас бөглөөгүй бол хил нэвтрүүлэхгүй гэдгийг анхаарууллаа.
