“Бэлчээр ба нүүдлийн мал аж ахуй эрхлэгчдийн олон улсын жил”-ийн хүрээнд зохион байгуулж буй Дэлхийн малчдын чуулганы Хангайн бүсийн салбар хэлэлцүүлэг Архангай аймгийн Булган суманд амжилттай боллоо.
Хоёр өдөр үргэлжилсэн тус хэлэлцүүлэгт гадаадын 10 орны 20 гаруй малчин, Архангай, Өвөрхангай аймгийн 60 гаруй малчин оролцож, нийт 80 гаруй төлөөлөл “Малчдын ерөнхий тунхаглал”, “Эмэгтэй малчдын тунхаглал”, “Залуу малчдын тунхаглал”-ын төслүүдийг хэлэлцэн, санал бодлоо тусгалаа.
Мөн үеэр КОП17-г угтан зохион байгуулж буй “Торгоны замын жингийн цуваа” олон улсын аяллын баг хүрэлцэн ирж хэлэлцүүлэгт нэгдэн, “Залуу малчдын тунхаглал”-ыг хэрэгжүүлэх боломж, гарц шийдлийн талаар санал солилцов.
Хангайн бүсийн салбар хэлэлцүүлгээс гарсан санал, зөвлөмжийг тунхаг бичгүүдэд тусган, Улаанбаатар хотноо наймдугаар сарын 14–15-нд зохион байгуулах Дэлхийн малчдын нэгдсэн чуулганаар эцэслэн хэлэлцүүлж, баталгаажуулахаар хүргүүллээ.
Түүнчлэн олон улсын малчид Архангай аймгийн Булган сумын бэлчээрийн зохион байгуулалт, малчдын сайн туршлагатай танилцаж, нүүдлийн мал аж ахуйн соёл, уламжлалыг харуулсан бэсрэг наадмыг үзэж сонирхлоо.
Дэлхийн малчдын чуулганы салбар хэлэлцүүлгийг орон нутагт зохион байгуулснаар Монгол малчид өөрсдийн санал, дуу хоолойгоо дэлхийн малчдын тунхаглалд тусгах боломжийг бүрдүүлж буйгаараа онцлог юм.
