Эрүүл мэндийн яамнаас Монгол Улсын Их хурлын хаврын чуулганаар батлагдсан Эм, эмнэлгийн хэрэгслийн тухай хууль /Шинэчилсэн найруулга/-ийг сурталчлан таниулах ажлыг эхлүүлээд байна.
Хууль таниулах эхний арга хэмжээг энэ сарын 5-нд зохион байгуулж, Эрүүл мэндийн сайд С.Чинзориг, ЭМЯ-ны Төрийн нарийн бичгийн дарга Д.Очирбат, Дэлхийн эрүүл мэндийн байгууллагын Монгол дахь Суурин төлөөлөгч Сокорро Эскаланте, НҮБ-ын Хүүхдийн сангийн Суурин төлөөлөгч Эваристе Куоасси-Комлан болон Эм, эмнэлгийн хэрэгслийн тухай хуулийг боловсруулж, батлуулах явцад Нийгмийн бодлогын байнгын хорооны ажлын хэсэгт ажилласан УИХ-ын гишүүн асан Д.Сарангэрэл, М.Оюунчимэг, Б.Жаргалмаа,нараас гадна хуулийг боловсруулж батлуулахад хувь нэмрээ оруулсан төрийн болон төрийн бус байгууллага, мэргэжлийн нийгэмлэг, холбоодын төлөөлөл оролцлоо.
Эрүүл мэндийн сайд С.Чинзориг, Дэлхийн эрүүл мэндийн байгууллагын Монгол дахь Суурин төлөөлөгч Сокорро Эскаланте, НҮБ-ын Хүүхдийн сангийн Суурин төлөөлөгч Эваристе Куоасси-Комлан нар тус үйл ажиллагааг нээж үг хэлэв.
С.Чинзориг сайд “Шинэ хуулиар малын болон хүний эм, эмнэлгийн хэрэгслийг хамтад нь зохицуулж байсныг салгасан. Эмээс гадна эмнэлгийн өндөр үнэтэй тоног төхөөрөмж, эмнэлгийн нэг удаагийн хэрэгсэл, протез, суулгац зэргийг хүний бие махбодид үзүүлэх эрсдэлээс хамааран ангилж тэдгээрт тавигдах шаардлага болон аюулгүй ажиллагааг хангах стандарт, заавар, хяналт зэргийг илүү тодорхойлон хуульчилж, эм, эмнэлгийн хэрэгсэл үйлдвэрлэх тусгай зөвшөөрөлтэй аж ахуйн нэгжид өөрийн үйлдвэрлэлд ашиглах түүхий эдээ импортлох, бүтээгдэхүүнээ ханган нийлүүлэх эрхийг тусгай зөвшөөрөлд нь багтаан олгохоор болсноор тусгай зөвшөөрлийн тоог цөөрүүлэх боломж бүрдсэн.
Хуульд эмийн үйлчилгээний идэвхжил буюу биоэквивалентыг тодорхойлох шинжилгээг үндэсний түвшний лаборатори болон төрөлжсөн мэргэшлийн эмнэлэгт хийдэг байх зохицуулалтыг тусгасан зэрэг зохицуулалтыг хийж өгсөн юм.
Түүнээс гадна эмийн үнийг бууруулж, чанарыг сайжруулах зорилгоор улсын төсвийн санхүүжилтээр худалдан авч байгаа эм, эмнэлгийн хэрэгслийг олон улсын чанарын шаардлага хангасан гадаад улсын үйлдвэрээс болон олон улсын байгууллагаас мөн ДЭМБ-ын үнэлгээгээр хүлээн зөвшөөрөгдсөн орноос шууд болон дамжуулан худалдан авах эрх зүйн орчинг бүрдүүлсэн” зэргээр Эм, эмнэлгийн хэрэгслийн тухай хуульд орсон зарчмын томоохон өөрчлөлтүүдийн талаар дурдаад, хууль боловсруулж, батлуулах явцад оролцсон төрийн болон төрийн бус байгууллага нийгэмлэг холбоодын төлөөлөлд талархал илэрхийлсэн юм.
Дэлхийн эрүүл мэндийн байгууллагын Монгол дахь Суурин төлөөлөгч Сокорро Эскаланте Эрүүл мэндийн сайд, хуулийн ажлын хэсгийн гишүүд болон хуулийн төсөл дээр хамтарч ажилласан бүх хүнд баяр хүргээд цаашид дагалдан гарах дүрэм, журмуудыг боловсруулах, хуулийг хэрэгжүүлэхэд ДЭМБ-ын зүгээс дэмжлэг үзүүлж хамтран ажиллахад бэлэн байгааг хэлсэн. Мөн тэрбээр эмийн чанар, аюулгүй байдал нь монгол хүний эрүүл мэнд, аюулгүй байдлыг хангахад маш чухал үүрэгтэй учраас Дэлхийн эрүүл мэндийн байгууллагын зүгээс цаашид эмийн бүртгэл, зах зээлийн дараах тандалтыг сайжруулах, эмийн хяналтын лабораторийг бэхжүүлэх зэрэг ажилд бүхий л талын дэмжлэгийг үзүүлнэ гэлээ.
Төрийн нарийн бичгийн дарга Д.Очирбат хуулийг хэрэгжүүлэхэд онцгойлон анхаарч хууль дагалдан гарах дүрэм, журам, стандартуудыг боловсруулах ажлыг ирэх аравдугаар сарын 1-нээс өмнө дуусгахаар ажиллаж байгаа тухай мэдээллийг өгсөн юм.
