Монголын улстөр угсаа залгамжилдаг ужгирсан тогтолцоотой болоод удаж байна. Олон жил улстөрийн алба хашсан хүмүүс буухдаа халаагаа бэлдэн угсаагаа залгамжлуулсаар Монголын улс төр бараг цус ойртох нь. Хөгширөөд буухдаа ч элчин сайдын суудалтай бууна гэж байгаа.
Угсаа залгамжлагчдыг дээрээс нь дурдвал МУ-ын Ерөнхийлөгч У.Хүрэлсүхийн дүү У.Отгонбаяр. Үйлдвэр худалдааны яамнаас төрийн албаа эхлүүлэн өдгөө гишүүн болсон түүнийг МУ-ын ерөнхийлөгчийн дүү гэх шошго хаа ч дагаж явах биз ээ.
Араас нь ерөнхийлөгч асан Н.Энхбаярын хүү Э.Батшугар ааваараа хөтлүүлэн улстөрд орсон тэрээр хоёр дахь удаагаа их хуралд сонгогдоод буй. Бентлигийн их сургуулийг Эдийн засгийн чиглэлээр дүүргэж, Америкийн хөрөнгө оруулалтын компаниас эхлээд Монгол банкны дэд ерөнхийлөгчөөр 4 жил ажилласан. Зээлийн хар жагсаалтын талаар дорвитой дугарч буй нь иргэдээс тун дажгүй оноо хүртээд байгаа.
Үргэлжлүүлэн УИХ-ын дарга асан Р.Гончигдоржийн охин Г.Уянгахишиг. Түүний аав УИХ-д 4 удаа сонгогдож, Ардчилсан намын даргаас авхуулаад УИХ-ын дарга хүртэл хийж явсан. Харин Г.Уянгахишиг 2024 онд аавынхаа намаас биш ХҮН намын жагсаалтад орон улстөрч болох замналаа эхлүүлэв.
УИХ-ын гишүүн, Эдийн засгийн хөгжлийн сайд асан Фортуна Н.Батбаярын охин Жаргалан. Ардчилсан эмэгтэйчүүдийн холбооны тэргүүнээр улстөрийн сууриа тавьж удалгүй АН-ын жагсаалтад бичигдэн улстөрийн босгоор аавынхаа үйл хэргийг үргэлжлүүлэн орж ирсэн юм.
Дараагийх нь УИХ-ын гишүүн асан Ц.Шинэбаяр агсаны хүү Ш.Бямбасүрэн. Түүний аав 2008-2012 онд Дорнод аймгаас УИХ-д сонгогдож байсан. Тиймдээ ч өнгөрсөн сонгуулиар МАН-ын эсрэг болж АН-аас гарч ирсэн ганц хүн нь юм. Ийн сонгогдоход аавынх нь нэр нүүр нилээдгүй байсан биз ээ.
За тэгээд дурдаад байвал Монгол улсын 17 дахь Ерөнхий сайд Д.Жасрай гуайн зээ охин А.Ариунзаяа, Батхүү агсаны дүү П.Батчимэг, БНХАУ-ын Өвөр Монголын өөртөө засах орны Хөх хотод суух Ерөнхий консулаар ажиллаж байсан Д.Мөнх-Эрдэнийн төрсөн дүү Д.Цогтбаатар, 2000-2004 онд УИХ-ын гишүүнээр ажиллаж байсан МУАБ С.Дуламын хүү д.Бум-Очир, гээд дурдаад байвал ураг төрлийн ургаа мод энд хүрээд дуусахгүй биз ээ.
