Засгийн газрын хуралдааны дараа Сангийн сайд, Экспортыг нэмэгдүүлж, валютын нөөцийг өсгөх ажлын хэсгийн ахлагч Б.Жавхлан мэдээлэл хийлээ. Тэрээр "Ажлын хэсэг гуравдугаар сарын 13-нд байгуулагдсанаас хойш хийж хэрэгжүүлсэн ажлын үр дүнд гадаад валютын нөөц өчигдрийн байдлаар таван тэрбум ам.долларт хүрлээ. Богино хугацаанд хагас тэрбум ам.доллароор нэмэгдсэн гэсэн үг. Ингэснээр гадаад валютын нөөц гурав дахь удаагаа таван тэрбум ам.долларын босгыг давж байна. Гадаад
валютын нөөц 2022 оны арваннэгдүгээр сар болон өнгөрсөн оны төгсгөлд таван тэрбум ам.долларын босгыг давж байсан юм.
Гадаад валютын нөөцийг нэмэгдүүлэхийн тулд ямар нэгэн байдлаар гадаад өрийн хэмжээг нэмэгдүүлээгүй гэдгийг албан ёсоор хэлье. БНХАУ-тай своп хийх гэрээ хүчинтэй хэвээрээ байгаа. Энэ бол валютын нөөцийг нэмэгдүүлэх хэрэгсэл гэсэн үг. Одоогоор үүнийгээ ашиглаагүй байна. Экспортынхоо биет хэмжээг нэмэгдүүлэхээр ажилласны үр дүн гарч байгаа" гэв.
