Бүгд Найрамдах Турк Улсын Анталья хотноо зохион байгуулагдаж буй Нэгдсэн Үндэстний Байгууллагын Уур амьсгалын өөрчлөлтийн суурь конвенцын Талуудын 31 дүгээр бага хурал (COP31)-д Байгаль орчин, уур амьсгалын өөрчлөлтийн яамны Бодлого, төлөвлөлтийн газрын дарга, доктор М.Намхайринчэн, академич Д.Дагвадорж тэргүүтэй Монгол Улсын хэлэлцээний баг оролцож байна.
Монгол Улсын хэлэлцээний баг 2026 оны арваннэгдүгээр сарын 7-8-ны өдрүүдэд зохион байгуулагдсан Хөгжиж буй орнуудын 77-гийн бүлэг (G77 and China)-ийн урьдчилсан бэлтгэл хуралдаанд оролцлоо.
Тус хуралдаанаар COP31-ийн хүрээнд хэлэлцэх асуудлаар хөгжиж буй орнуудын нийтлэг байр суурийг нэгтгэх, хэлэлцээний стратеги, тэргүүлэх чиглэлийг тодорхойлох, хамтын ажиллагааны асуудлаар санал солилцов.
Хөгжиж буй орнуудын 77-гийн бүлэг нь дэлхийн 130 гаруй хөгжиж буй орныг нэгтгэсэн, олон улсын хэлэлцээний хүрээнд эдгээр орны нийтлэг ашиг сонирхол, байр суурийг илэрхийлдэг томоохон бүлэг юм.
Ингэхдээ уур амьсгалын өөрчлөлтийн нөлөөлөл, эрсдэлийг бууруулах, дасан зохицох, хүлэмжийн хийн ялгарлыг сааруулах, байгаль орчинд ээлтэй технологи дамжуулах, нүүрстөрөгчийн зах зээлийг хөгжүүлэх, уур амьсгалын санхүүжилтийн хүртээмжийг нэмэгдүүлэх зэрэг асуудлаар улс орнуудын нэгдсэн байр суурийг боловсруулж, бага хурлын шийдвэрт тусгуулахад чухал үүрэг гүйцэтгэдэг.
COP31 бага хурал 2026 оны арваннэгдүгээр сарын 9-20-ны өдрүүдэд Бүгд Найрамдах Турк Улсын Анталья хотноо зохион байгуулагдана.
Бага хурлын өндөр дээд түвшний хуралдаанд Монгол Улсын Гадаад харилцааны сайд Б.Батцэцэг, Байгаль орчин, уур амьсгалын өөрчлөлтийн сайд Ц.Сандаг-Очир нар оролцоно.
Бага хурлаар НҮБ-ын Уур амьсгалын өөрчлөлтийн суурь конвенц болон Парисын хэлэлцээрийн хэрэгжилтийг эрчимжүүлэх, улс орнуудын уур амьсгалын өөрчлөлттэй тэмцэх үндэсний зорилт, амлалтыг хэрэгжүүлэхэд дэмжлэг үзүүлэх, хөгжиж буй орнуудад шаардлагатай санхүүжилт олгох, технологи дамжуулах, үндэсний чадавхыг бэхжүүлэх чиглэлээр олон улсын хамтын ажиллагааг өргөжүүлэх асуудлыг хэлэлцэж, холбогдох шийдвэрүүдийг гаргана.
Монгол Улсын хэлэлцээний баг тус бага хурлын хүрээнд уур амьсгалын өөрчлөлтөд дасан зохицох, цөлжилт, газрын доройтлыг бууруулах, байгаль орчны асуудлаарх олон улсын конвенц, хэлэлцээрүүдийн хэрэгжилтийн уялдаа холбоог хангах, уур амьсгалын санхүүжилтийн хүртээмжийг нэмэгдүүлэх, Парисын хэлэлцээрийн 6 дугаар зүйлийн хүрээнд нүүрстөрөгчийн зах зээлийн хамтын ажиллагааг хөгжүүлэх зэрэг Монгол Улсын тэргүүлэх ач холбогдол бүхий асуудлаар хэлэлцээнд оролцохоор төлөвлөж байна.
