Төр эмч нараас өргөсөн тангарагыг нь нэхэх эрхтэй юу?
Багш эмч нар цалингаа, хөгшид тэтгэврээ нэмүүлэх гэж жагсаал цуглаан суулт болж, сүүлдээ ажил хаяан улс орон эмч багшгүй болоод нэлээд хэд хоносон. Багш нар 13 дахь хоног дээрээ 2,8 сая төгрөгийн цалин дээр тохиролцож ажил хаялтаа зогсоолоо.
Харин эмч нарын цалинг яаж шийдэх вэ? Сүхбаатарын талбай дээр нийслэл дүүрэг орон нутгийн эмнэлгийн 3000 гаруй эмч, эмнэлгийн ажилтнууд жагсаж Төрийн ордон тойрон гороолсон.
Талбай дээр 7 хоног суулт хийсэн эмч нарынхаа эрх ашгийг хамгаалж үндэсний хэмжээний ажил хаялтад шилжих бэлтгэлээ хангаж эхэлсэн талаар МҮЭХ мэдэгдээд байгаа. Эх хүүхдийн эрүүл мэндийн үндэсний төв, яаралтай түргэн тусламжийн 103 зэрэг яаралтай тусламжийн эмнэлгүүдээс бусад нь ажил хаялтад нэгдэхээ илэрхийлж эхэлжээ.
Өдөр шөнө өглөө оройгүй, цай уух ч завгүй шахуу өвдөж зовсон хүмүүстэй нүүр тулж, зовлон шаналал дунд ажилладаг эмч эмнэлгийн ажилтнуудын цалин өнөөдөр дунджаар 1.5-1,8 сая төгрөг.
Тулаа хийж, жижүүрт гарч, амрах ч завгүй мэс засал хийж байж ийм мөнгийг гар дээрээ авдаг.
Мэргэжилдээ дуртай, өргөсөн тангарагтаа үнэнч тулдаа бага цалинтай ч ажлаа хийсээр ирсэн.
Харин одоо эрүүл мэндийн салбарынхны ажил хаялтад Төр бэлэн үү?
Сарын 1000 доллар буюу 3,5 сая төгрөгийн цалинг шийдэх шийдэл гарцыг хайж байна уу? Чинбүрэн сайд аа.
Эмч бол багш биш. Ажил хаясан минут секунд бүрээр эрдэнэт хүний амь нас хэмжигдэнэ. Хүн ардынхаа эрүүл мэндийг хамгаалахын төлөө тангараг өргөсөн хэдий ч наад захын амьдралынх хэрэгцээг нь хангаж өгч чадахгүй сарын 300-400 доллараар амь амьдралыг нь зогоож байгаа ТӨР эмч нараас өргөсөн тангарагтаа үнэнч байхыг нэхэх, шаардах эрхтэй юу?
