Үндэсний батлан хамгаалахын их сургууль, Дотоод хэргийн их сургуулийн хичээлийн жилийн төгсөлтийн баярын ёслол хүндэтгэлийн арга хэмжээнд Монгол Улсын Ерөнхийлөгч, Зэвсэгт хүчний Ерөнхий командлагч У.Хүрэлсүх, Батлан хамгаалахын сайд Д.Батлут, Хууль зүй, дотоод хэргийн сайд Л.Мөнхбаатар нарын хамт оролцлоо.
Дотоод хэргийн их сургуулийн 2024-2025 оны хичээлийн жилд Удирдлагын академийг магистрын хөтөлбөрөөр 24, Цагдаагийн сургууль, Хилийн албаны сургууль, Шүүхийн шийдвэр гүйцэтгэлийн албаны сургууль, Онцгой байдлын сургууль, Эрх зүй, нийгмийн ухааны сургууль, Шинжлэн магадлах ухааны сургуулийг бакалаврын 18 хөтөлбөрөөр 530 гаруй сонсогч, суралцагч ийнхүү амжилттай төгсөж байна.
Эрхэм төгсөгчид та бүхэндээ эх орныхоо тусгаар тогтнол, газар нутгийн бүрэн бүтэн, халдашгүй дархан байдал, улс орон ард иргэдийнхээ амгалан тайвныг сахин хамгаалах үйлсэд нь өндөр амжилт, сайн сайхан бүхнийг хүсэн ерөөе.
