Хуульч, өмгөөлөгч Р.Булгамаа БНСУ-ын визэнд орж буй иргэдэд тулгарч буй асуудлаар Хүний эрхийн үндэсний комисст гомдол гаргаж, Гадаад харилцааны сайд Б.Батцэцэгт албан бичиг хүргүүлжээ. Уг бичигт "БНСУ руу зорчих виз мэдүүлэхэд гадаад паспортыг 30-40 орчим хоног хураан авч, чөлөөтэй зорчих эрхийг хязгаарлаж байна. Аргагүй шалтгаанаар паспортаа буцаан авсан тохиолдолд визийн өргөдлийг цуцалж, хураамжийг буцаан олгодоггүй нэмж хохироодог. Виз олгохоос татгалзсан шалтгаанаа "зорилго тодорхой биш" гэх хариу өгч байгаа нь өргөдлөө хэрхэн сайжруулах, ямар баримт бүрдүүлэх талаарх мэдэх эрхийг хязгаарлаж байна" гэсэн байна.
БНСУ-ын визэнд ороход Монгол Улсын иргэдийн гадаад паспортыг олон хоног хураан авч, өөр улс оронд зорчихыг нь хязгаарладаг. Энэ нь Монгол Улсын Үндсэн хуулийн 16 дугаар зүйлийн 18 дахь заалт, Иргэний болон улстөрийн эрхийн олон улсын пактын 12 дугаар зүйлээр баталгаажуулсан чөлөөтэй зорчих эрх зөрчигдөж байгаа тул эл асуудалд анхаарлаа хандуулж, тодорхой арга хэмжээ авч өгөхийг албан бичигтээ дурджээ.
