Хорхе Рафаэл Видела Редондо (Испани: Jorge Rafael Videla Redondo, 1925 оны 8-р сарын 2-нд Буэнос-Айресын Мерседес дүүрэгт төрсөн, 2013 оны 5-р сарын 17-нд Буэнос-Айрес мужид нас барсан) нь Аргентин улсын 43 дахь ерөнхийлөгчөөр 1976-аас 1981 онд ажилласан улс төрч, цэргийн зүтгэлтэн юм. Тэрээр Изабел Мартинес де Пероныг түлхэн унагаж, төрийн эргэлтээр засгийн эрхийг авчээ. Ардчилал эргэн тогтсоны дараа тэрээр түүний засаглалын үед гарч байсан хүч хэрэглэх, хуулиас гадуурх аллага, улс төрийн эсрэг үзэлтнүүд, тэдний гэр бүлийг нууц хорих лагерьт тамлан зовоодог байсан гэх зэрэг хүний эрх зөрчсөн, хүн төрөлхтний эсрэг гэмт хэрэгт холбогдон шүүгдэж байсан билээ. Мөн олон хүүхдийг хулгайлан, тусгай хорих газарт цагддаг байв. Эдгээр хэргүүдийнхээ улмаас тэрээр 2008 оны 10 сарын 10-ныг хүртэл гэрийн хорионд байсан бөгөөд улмаар цэргийн шоронд хоригджээ. 2010 оны 7 сарын 5-нд Видела түүний засаглалын үед армийнхны хийсэн бүх үйлдлийн бүрэн хариуцлагыг хүлээхээ мэдэгдсэн байна. Тэрээр Аргентины шүүхийн танхимд "Би дотоодын дайн самууны үеэрх цэргийн дээд эрх мэдлийг барьж байсныхаа хувьд хариуцлагаа хүлээн зөвшөөрч байна. Доод албан тушаалтнууд миний тушаалыг дагаж байсан." гэж мэдүүлжээ. 2010 оны 12 сарын 22-нд Виделаг иргэний шүүхээс төрийн эргэлт хийснийхээ дараа 31 хоригдлыг хороосон хэргээр бүх насаар нь хорих ялаар шийтгэсэн.
Гол баримтууд: Амьдарсан хугацаа: 1925 оны 8-р сарын 2 – 2013 оны 5-р сарын 17. Засаглал: "Бохир дайн" гэгддэг үеэр цэргийн хунтыг удирдсан. Гэмт хэрэг: Түүний дэглэм нь олон нийтийг хамарсан хэлмэгдүүлэлт, эрүү шүүлт, хүн амины хэрэг, 9000-аас 30000 хүртэлх хүний сураггүй алга болсон явдал болон улс төрийн хоригдлуудын хүүхдүүдийг системтэйгээр хулгайлсан хэргүүдэд буруутай байв. Шүүх хурал ба нас баралт: Хүн төрөлхтний эсрэг үйлдсэн гэмт хэргийнхээ төлөө бүх насаараа хоригдох ял сонссон. 2013 онд шоронд нас баржээ.
