"Наран Трейд" ХХК-ын С.Болдхэт, Д.Удвал нар 600 гаруй хүүхдийн сурах эрхийг зөрчиж, сургуулийг нь хүч хэрэглэн хаажээ
Хичээлийн шинэ жил 7 хүрэхгүй хоногийн дараа эхлэх гэж байхад Монтэ Роза сургуулийн 600 гаруй хүүхдийн сурах эрх ноцтой зөрчигдөж, суралцах боломжгүй нөхцөл байдалд хүрчээ.
Тус сургуулийн барилгын газрыг 30 жилийн өмнө Наран трейд ХХК “Сургууль барина хэмээн авчээ. Гэвч орон сууц барихаар удаа дараа зэхэж, иргэдийн эсэргүүцэлтэй тулан газраа буцааж өгөхийн эрхэнд сургуулийн барилга барин Монтэ Роза гэх сургуульд 15 жилийн хугацаагаар түрээслүүлжээ.
Гэвч Наран трейдийн боссууд сургуулийн захиргаатай санхүү мөнгөний үл ойлголцол үүсгэж шүүх цагдаад асуудал нь хүрч, улмаар шүүхийн шийдвэргүйгээр хүч түрэн сургуулийг хаан, битүүмжилжээ.
Тодруулбал, Наран трейдынхэн шөнө дөлөөр сургуулийн цонхыг хагалан орж, эд хогшлыг нь нүүлгэлтийн машинд, 30 гаруй залуусаар ачуулж, сурагчдын хувийн хэргийг барьцаалсан байна.
Үүнээс үүдэн тус сургуулийн 600 орчим хүүхдийн эцэг эх өчигдөр сургуулийн гадна талбайд цуглан хүүхдүүдийн сурах эрхийг хангаж өгөхийг хүссэн албан бичгийг холбогдох байгууллагуудад хүргүүлж эхэлжээ
Энэ талаар тус сургуулийн захирал Р.Эрдэнэ-Очир Наран трейд газрын гэрчилгээ гарсан цагаас эхлэн биднийг гаргах оролдлогууд удаа дараа хийж, түрээсээ нэмэх, цахилгаан таслах гэх мэт эс үйлдэхүй байнга хийсээр ирсэн тухай ярилаа.
Тэгвэл Наран трейдийн эзэд С.Болдхэт, Д.Удвал нар газрын гэрчилгээгээ сунгахын тулд 600 гаруй хүүхдийн сурах үндсэн эрхийг зоосны нүхээр харав уу. Энэ асуудалд ямар хариуцлага тооцох вээ Л.Энх-Амгалан сайдаа,
